Díli-SMI: Instituisaun Falintil Forsa Defeza Timor-Leste – F-FDTL presiza rekursu umanu iha área diretu, saúde no enjenéria, nune’e Governu liu-hosi Ministeriu Defeza – MD sei halo rekrutamentu ba timoroan hamutuk ema na’in 80 ne’ebé remata ona lisensiatura no mestradu iha área refere.
Relasiona ho dezenvolvimentu instituisaun F-FDTL refere, Ministru Defeza, Filomeno Paixão de Jesus hamutuk ho Xefe Estadu Maior Jenerál F-FDTL – XEMJFA, Tenente Jeneral, Falur Rate Laek, hala’o enkontru ho Primeiru Ministru, Taur Matan Ruak, hodi diskute kona-ba asuntu refere.
“Enkontru ne’e, (ami) informa Sua-Exelénsia Primeiru Ministru kona-ba rekrutamentu ba ofisiais sira foun hamutuk na’in 80 resin.
“Rektrutamentu ne’e la-to’o atus ida, maizumenus ema na’in 80 resin liu-liu ba área sira ne’ebé fors presiza hanesan haree parte lei, infrastrutura ne’ebé haree enjenéria, parte saúde bai ha médiku sira”, dehan, Ministru Defeza, Filomeno Paixão, iha Palásiu Governu hafoin enkontru ho PM, Taur Matan Ruak, foin lalais ne’e.
Planu rekrutamentu ba membru F-FDTL ne’e ba ofisial sira de’it ne’ebé liga ho área importante tolu hanesan diretu, saúde no enjenéria hodi bele kompleta kuadru pesoal ne’ebé instituisaun F-FDTL presiza.
“Rekrutamentu ne’ebé ho tipu ofisiais, tanba haree ba área sira ne’ebe sei falta rekursu humanu ida ne’e mak parte hola atensaun hodi halo rekrutamentu nune’e ba oin bele halo kompletu tiha kuadru pesoal iha F-FDTL”, tenik, Filomeno Paixão.
Liga ho planu rekrutamentu ne’e, Xefe Governu, Taur Matan Ruak, konkorda prosesu rekrutamentu tanba importante tebes ba rekursu umanu instituisaun F-FDTL iha futuru.
“Asuntu kona-ba rekrutamentu ba forsa F-FDTL ofisiais, parte Primeiru Ministru Taur Matan Ruak, konkorda ho rekrutamentu foun ne’e tanba asuntu ne’e nu’udar programa governu nian tenke realiza.
Asuntu importante sira seluk ne’ebé ko’alia iha ekontru mak hanesan haree ba iha akizasaun armanetu inklui ró rua apoiu hosi Australia hodi bele fasilita F-FDTL kontra peska ilegál iha tasi parte Kosta-Sul nian. (Editór, Guido Santos).
