Díli-SMI: Prezidente Repúblika, Jose Ramos Horta, argumenta katak Timor-Leste ukun ona durante tinan rua nolu resin ona maibe laiha Governu ida mak tau atensaun seriu ba investimentu iha área agrikultura hodi garante seguransa alimentar iha rai-laran.
“Tinan 20 nia laran, la iha governu ida ne’ebé konsidera agrikultura, seguransa alimentár hanesan priordade númeru ida”, dehan, Prezidente Repúblika, Jose Ramos Horta, partisipa lansamentu programa seguransa alimentar, foin lalais ne’e iha Díli.
Wainhira Governu la fó importansia investimentu iha área agrikultura mak nasaun no povu ida-ne’e sei hasoru problema boot kona-ba seguransa alimentar no nutrisaun iha futuru oin mai.
“Ita (sei) labele (hanesan) nasaun forte ida, karik la iha %100 seguransa alimentár, soberanu iha agrikultura, bé moos no nutrisaun”, Ramos Horta, dehan.
Nune’e, Xefe Estadu agradese ba Ajénsia Internasional hanesn USAID ne’ebé kontinua fó apoiu fundu hodi dezenvolve área agrikultura hodi bele garante seguransa alimentar iha nasaun ne’e.
Ho esperansa ida katak programa ne’ebé finansia ho orsamentu millaun 4 dollar Amerikanu ne’e bele implementa ho di’ak hodi bele fó benefisiu ba agrikultór sira iha área rural.
“Agradese administrasaun Amerikana liu husi USAID, ne’ebé kontinua apoia dezenvolvimentu Timor-Leste iha tinan 20 nia laran.
“Agora ho programa ida ne’e, karik ezekuta di’ák, bele iha duni impaktu ba seguransa alimentár liu-liu ba povu iha zona rural”, Horta, tenik.
Maibe, Governu liu-liu parte ministéru kompetente tenke iha kapasidade tekniku ne’ebé adekuadu hodi bele ajuda implementasaun programa ne’e ho efisénsia no efikásia.
“Membru governu ne’ebé lidera seitór agrikultura, tenke iha formasaun espesializada iha àrea ne’e, hodi haforsa alokasaun osamentu ne’ebé bele estimula dezenvolvimentu nasionál”, Horta, rekomenda.
Parte USAID rasik fiar katak ho apoiu finanseiru ne’ebé aloka sei kontribui pozitivu ba programa hadi’a seguransa ai-han, nutrisaun no rezilénsia hasoru krize alimentar iha rai-laran.
“Apoiu finanseiru ne’e sei garante seguransa alimentar iha Timor-Leste. Rekursu hirak ne’e sei proteje Timor-oan husi krize ai-han ne’ebé sei at liu tanba funu iha Ukránia no ajuda harii seguransa ai-han no nutrisaun ba tempu naruk,’’ Diretór Jerál USAID, Gillian Caldwell, katak.
Programa ne’e sei implementa iha munisípiu Aileu, Ainaro, Baukau, Bobonaro, Covalima, Ermera, Lautém, Manatutu, Manufahi no Viqueque. (Editór, Rui Santos).
