Díli-SMI: Governu Korea do Sul liu-hosi ninia embasada iha Timor-Leste hatudu protidaun atu apoiu Governu hodi prepara rekursu umanu antes Timor-Leste tama nu’udar membru permanente iha organizasaun ASEAN.
“Área importante ida-ne’ebé ohin ha’u diskuti ho eselénsia mak kona-ba Timor-Leste nia esforsu atu adere ba ASEAN.
“Governu Korea kompremetidu atu apoiu Timor-Leste (ba) preparasaun, liu-liu kapasituasaun rekursu umanu”, dehan, Embaxadór, Korea do Sul, Shin Mantaek, hafoin hala’o ninia enkontru dahuluk ho Xefe Estadu, Jose Ramos Horta, iha Palásiu Prezidensial, Aitarak Laran – Díli, foin lalais ne’e.
Komprimisiu no protidaun hosi Governu Korea do Sul ne’e atu bele ajuda ka prepara di’ak liu-tan rekursu umanu TL nia antes tama ba ASEAN ho status permanente.
Embaxadór foun ne’e konsidera katak rekursu umanu ne’e hanesan fatór importante tebes atu fasilita adezaun TL nia ba organizasaun ASEAN refere.
“Área importante ida-ne’ebé ohin ha’u diskuti ho eselénsia mak kona-ba Timor-Leste nia esforsu atu adere ba ASEAN, governu Korea kompremetidu atu apoiu Timor-Leste preparasaun, liu-liu kapasituasaun rekursu umanu”, Shin, tenik.
Hosi diskusaun entre reprezentante Governu Korea do Sul ho Prezidente Repúblika, Jose Ramos Horta, kobre asuntu lubuk ida ne’ebé nasaun rua ne’e atu halo iha área diplomasia nian.
“Ami diskuti área barak teb-tebes, maibé sei enkontru tuir mai para oinsá ami bele halo planu detallus iha áreas ne’ebé ami diskuti, hodi nune’e bele ajuda duni Timor-Leste ninia dezevolvimentu,” esplika, Shin Mantaek.
Koperasaun diplomátika entre nasaun rua hanesan TL no Korea do Sul kompleta ona tinan 20, maibé governu Korea do Sul promete reforsa tan kooperasaun hanesan nasaun amigo, hodi tulun malu iha futuru. (Editór, Guido Santos).
