Díli-SMI: Oitavu Governu liu-hosi Ministériu Obras Públikas – MOP sei la-tolera ba kompañia sira hetan projetu konstrusaun no rehabilitasaun estrada maibe laiha kapasidade finanseiru, tekniku no esperensia hodi finaliza projetu tuir kontratu.
Liu-liu ba projetu estrada ne’ebé emprezáriu lokál sira ezkuta dezde tinan 2015 to’o 2017 maibe seidauk finaliza, parte MOP sei entrega fila fali ba kompañia seluk ne’ebé iha kapasidade finanseiru no tekniku hodi bele finaliza lalais projetu refere.
“Ba projetu estrada hirak ne’ebé empreza lokál sira ezekuta dezde 2015 mai to’o 2017 seidauk finaliza, Ministériu Obras Públikas rasik hala’o ona enkontru ho konstrutór sira no MOP liuhosi diresaun estrada notifika no hapara projetu sira ne’e
“No entrega fali ba kompañia seluk ne’ebé iha kapasidade finanséiru, tékniku no iha esperiénsia implementa projetu”, dehan, Ministru Obras Públikas. Eng. Abel Pires da Silva, foin lalais ne’e iha Díli.
Razaun hosi Governu hodi foti medida hasoru kompañia sira ne’e atu bele kompleta lalais ezekusaun Orsamentu Jeral Estadu – OJE nian. Nune’e mós atu kompañia sira bele finaliza lalais estrada atu fasilita komunidade ninia movimentu ba nesesidade lor-loron nian.
“Ita tenta atu rezolve projetu sira ne’e iha tinan kotuk, kuandu ami halo reuniaun dala tolu ho kompañia sira, husu sira para bele halo lais, ne’e la’os de’it tanba ita hakarak obra ne’e la’o para ita-nia povu bele goja fasilidade importante sira hanesan estrada sira ne’e.
“Atu fasilita ezekusaun orsamentu iha momentu ne’eba i ba hirak ne’ebé kleur demias ona, projetu husi 2015 ne’e iha hela, la’o hela balun ita hapara, ita hapara no labele kontinua extende hela de’it sein limite, ne’ebé balun ita hapara ona ita entrega fali ba kompañia seluk”, esplika, MOP, Abel Pires.
Durante ne’e, parte MOP hapara ona kompañia lokal balun ne’ebé la-kumpri kontratu implementasaun projetu tanba husu estensaun projetu hela de’it.
Tuir esperénsia kompañia balun implementa projetu estrada to’o lori tinan barak no husu estensaun maibe projetu ne’e rasik seidauk atinji 70% hosi projetu refere.
“ita buka balansu entre apoiu ita-nia kontraktór lokál sira, emprezáriu lokál sira no mós interese estadu nian tanba ne’e mak sira ne’ebé kleur demais ona ne’e ita hapara, ne’ebé ida rua ita hapara ona.
“Projetu estrada mak hapara, estrada ita haree lubuk ida, kuandu kelur demais ona mak la to’o 70% mak sira husu para atu halo extensaun ha’u dehan lae”, Abel, tenik.
Relasiona ho kapasidade kompañia lokal sira la-konsege finaliza projetu tuir kontratu ne’e la’os buat foun maibe babain ona akontese no públiku ka sosiadade mós hatene hela asuntu refere.
Parte MOP sei fó toleransia ba kompañia ne’ebé ezekuta projetu estrada iha área rural ne’ebé finaliza la-tuir kontratu maibe laiha toleransia ba kompañia ne’ebé ezekuta projetu estrada iha munisípiu no nasional nian. (Editór, Rui Santos).
