Díli-SMI: Atúal Primeiru Ministru, Taur Matan Ruak, konsidera Prezidente Repúblika, José Ramos Horta, halo abuzu podér tanba hakarak defende autór subar kilat ilegal, Longuinhos Monteiro, hodi fó ultimatum ba nia halo denúnsia públika no lakohi enkontru semanal.
"Kazu ida Loes, ha’u iha dia 09 ha’u viajem mai husi Kanberra mai Darwin, ha’u iha aviaun laran Senór Ministru Fidelis telephone ba ha’u dehan Prezidente da Repúblika preokupadu loos tanba SNI ba atu revista senór Longuinhos nia uma.
“Tanba ne’e husu ba Primeiru-Ministru hasai Diretór SNI nian, sei la hasai Prezidente halo buat rua ida denunsia ba públiku, ida seluk hapara enkontru semanál ho Primeiru-Ministru.
“Ha’u iha aviaun laran ha’u responde ba Senór Ministru hateten ba Prezidente rua ne’e ha’u simu hotu, denunsia ba públiku no hapara enkontru semanal ho Primeiru-Ministru mós ha’u simu”, dehan, Primeiru Ministru, Taur Matan Ruak, foin lalais ne’e iha Díli.
Atu bele hatene mutivu loloos Prezidente Repúblika, José Ramos Horta, lider masimu VIII Governu ne’e fó orientasaun ba ninia Xefe Gabinete atu buka informasaun tanba-sa mak PR fó ultimatum ba Primeiru Ministru.
Wainhira buka tuir informasaun, PR Ramos Horta ninia ultimatum ne’e relasiona ho mandatu tribunal ba SNI atu halo revista ba Longuinhos Monteiro ninia rezidénsia liga ho kazu subar kilat ilegal nian.
“Ha’u to’o iha Darwin ha’u haruka ha’u nia Xefe Gabinete buka hatene saída mak akontese iha ne’ebá i kuandu ha’u buka hatene sira haruka mandatu Tribunal nian.
“Entaun ha’u hakfodak ne’e, sei ida-ne’e mandatu Tribunal tanba-saida mak Prezidente fó fali ultimatu ba Primeiru-Ministru, ha’u hanoin ida ne’e abuza poder uitoan, prapotensia uitoan husi Parte Prezidente da Repúblika nian ké labele”, Taur, tenik.
Tuir loloos, Xefe Estadu ida nu’udar órgaun soberania no simbolu nasaun presiza kuidadu no sukat antes atu halo ultimatum ida hasoru ema ka órgaun seluk
“Prezidente da Repúblika orgaun no simbolu nasaun nian entaun tenke sukat nia komportamentu hotu ne’e nia sukat kuidadu loos labele hanesan fali coboida demais, iha Timor ne’e laiha ema ida iha lei nia leten inklui Prezidente da Repúblika, hotu-hotu iha lei nia okos,
“Ha’u eis Prezidente ne’ebé ha’u hatene saída mak ha’u koalia, ha’u preokupa uitoan mas ita aprende dalaruma sira ne’ebé fó informasaun ba Nai Prezidente fó sala depois Prezidente envez rona ho kalma lae, bidu uluk mak entaun mak hanesan ne’e". PM, Taur, katak. (Editór, Guido Santos).
