Díli-SMI: Sentru Mídia Investigativu – SMI no Learning Progress Development – LPD asina ona nota koperasaun kona-ba serbisu hamutuk atu fasilita formasaun jornalizmu investigative no lian Korea ba foinsa’e timoroan sira iha rai-laran.
Diretóra Ezekutivu LPD, Zelia de Jesus, esplika, objetivu fundamentu hosi koperasaun entre SMI ho LPD mak atu bele tau forsa hamutuk hodi fasilita formasaun ba maluk timoroan sira ne’ebé remata ona sira nia estudu iha nivé sekundaria maibe la-kontinua ba universidade tanba kestaun ekonómia.
“Koperasaun entre SMI ho LPD ne’e ho ninia intensaun prinsipal mak atu bele prepara rekursu umanu timoroan atu hetan skill ruma. Liu-liu mak atu fasilita formasaun jornalizmu nian nomós lian Korea atu nune’e joven sira bele hetan kuiñesementu ka skill hodi buka serbisu iha rai-laran ka rai-liur.
“LPD rasik durante ne’e fó ona formasaun ba joven barak iha área língua Korea nian, hosi formasaun ne’ebé LPD fasilita joven barak mak hetan ona oportunidade serbisu iha rai-liur hanesan nasaun Korea, liu-hosi programa Governu nian ne’ebé kada-tinan SEFOPE rekruta hodi ba serbisu iha Korea do Sul.
Zelia Freitas, hatutan, SMI ho LPD ne’ebé ho ida-idak ninia esperensia naton iha área formasaun ne’ebé diferente bele kompleta malu hodi serbi ninia maluk timoroan sira ne’ebé presiza aumenta kuiñesementu ka hakarak apriende kona-ba mídia no lian Korea nian.
“Ami mai ho esperensia ne’ebé naton no diferente hodi tau forsa hamutuk, kompleta malu hodi nune’e bele halo buat ruma ba ita nia sosiadade no nasaun. Liu-hosi koperasaun ne’e mós bele hametin liu-tan relasaun amizade entre SMI no LPD rasik”, Tenik, Zelia.
Diretora no treinadora lian Korea ne’e ninia espetasaun katak koperasaun entre SMI ho LPD ne’e bele dura no metin hodi nune’e bele luta hamutuk hodi prepara joven iha prosesu konstrusaun estadu no dezenvolimentu nasional.
Iha parte seluk, Fundador SMI, Caetano “Atay” Alves, agradese ba LPD ne’ebé iha interese atu halo koperasaun ho SMI atu realiza formasaun jornalizmu investigativu no lian Korea ba joven sira.
“Nu’udar fundador SMI sente kontente no apresia ba LPD rasik ne’ebé hakarak halo koperasaun iha área formasaun nian. Dezde 2017 – 2019, SMI konsege halo formasaun jornalizmu etapa da-lima ne’ebé konsege fasilita joven maizumenus besik atus rua (200) resin.
“No, hosi joven 200 resin ne’ebé tuir formasaun iha SMI maioria hetan ona serbisu, barak liu iha área jornalizmu ka sai jornalista iha mídia nasional sira hanesan televizaun, jornal no balun sai asistente mídia nian iha instituisaun sira hanesan polisia, militár no seluk tan”, katak, Atay Alves.
Fundador SMI ne’e mós afirma, koperasaun ho LPD ne’e foka liu ba formasaun ka kapasitasaun mak parte LPD mak sei toma konta ba formasaun lian Koreia no SMI rasik mak foku ba formasaun multimedia no jornalizmu investigativu nian.
“Koperasaun ne’e foka liu ba formasaun nian maibe ami ida-idak toma konta ba área formasaun nian. Hosi LPD foku ba formasaun lian Korea no parte ami SMI ne’e foku formasaun ba iha área jornalizmu nian”, tenik, eis peskizador Fundasaun Mahein ne’e.
Bazeia ba akordu koperasaun ne’ebé asina ona hosi parte SMI no LPD sei implementa liu-hosi asaun hanesan fó sai anúnsiu hamutuk kona-ba formasaun nian no atividade seluk sira iha futuru oin mai. (Editór, Caleri).
