24
Mon, Jun
0 New Articles

Servisu Sekretu Kaptura Membru GAM Na’in 4 Iha Becora

Parte seguransa kaptura membru GAM hosi IKS hamutuk ema na’in 4 iha foho leten área Becora nian. Foto, Mídia RSP.

Flash News

Díli-SMI: Servisu sekretu sira hosi instituisaun polisial no milítar seguda, (17/04) foin lalais ne’e kaptura membru Grupu Arte Marsial hamutuk ema na’in 4 iha área Benaemauk, Aldeia Mota Ulun, Suku Becora, Postu Administrador Cristo-Rei, Munisipiu Díli tanba involve krime tuda malu.

“Servisu Informasaun Polisia Nasional (SIPN) Aranha Leste, Aranha Oeste, Forsa Polisia (FP) junta ho SNI (Servisu Nasionál Intelejénsia) inklui Forsa Rezerva no ekipa Patrulla PNTL Esquadra Cristo Rei, asegura suspeitu nain-4 ne’ebé envolve iha krime tuda malu entre grupu no kria instabilidade iha area Benaemauk, Aldeia Mota Ulun, Suku Becora, Postu-Administrativu Cristo-Rei, Munisípiu Dili”, haktuir, Komunikadu ofisiál Ministériu Interior ne’ebé SMI asesu foin lalais ne’e.

Ekipa konjunta hosi servisu sekreta sira ne’e kaptura membru GAM hosi IKS na’in 4 iha foho leten parte área Becora nian no na’in 2 mak la-kosege kaptura hodi halai lakon hodi ekipa konjunta nia duni.

“Hare’e ba situasaun komesa grave ekipa konjunta lansa operasaun hodi duni tuir sae ba foho leten no konsege asegura suspeitu nain-4 hosi Grupu IKS nian maibe nain rua seluk konsege halai sae liu tan ba foho leten halo ekipa servisu duni latoman tanba dalan laiha no rai tahu deit.

“Hafoin simu orientasaun ekipa servisu to'o iha fatin akontesementu hodi hakalma situasaun maibe husi parte GAM KORK hamutuk ho GAR 77 koopera ho diak hodi hakalma situasaun enkuantu husi parte GAM Ikatan Kera Sakti (IKS) kontinua lori fatuk tuda hasoru ekipa konjunta inklui tuda fatuk hasoru ba komunidade sira nia uma hodi rezulta kareta ida hetan estragu iha vidru oin”, haktuir hosi Komunikadu.

Membru GAM hosi IKS ne’ebé hetan kapturasaun hosi parte seguransa sira mak hanesan, L A husi IKS, hela iha Lequidoe Munisipiu Aileu, suspeitu RS husi IKS, hela iha Aldeia Tuku Itin, Suku Cribas, Munisipiu Manatuto, enkuantu Suspeitu JS ho MS, hela iha Bairu Benaemauk, Aldeia Mota Ulun, Suku Bekora, Munisipiu Dili.

Hosi rezultadu kapturasaun ne’e,  suspeitu na’in-4 ne’e ekipa servisu halo kedas prevensaun hodi entrega ba Forsa Rezerva no ekipa Patrulla PNTL Esquadra Cristo Rei, lori mai Esquadra PNTL Cristo Rei hodi halo detensaun durante 24h no sei kontinua halo prosesu investigasaun.

Durante halo kapturasaun, ekipa konsege asegura mos sasan kroat sira hanesan Rama Ambon-1, Katana (tipu surik-4), maubeka naruk-1, tudik-2, besi kanu-1, Ai (tongkat)-1, inklui fatuk hodi lansa iha vizka iha pasta ida nia laran.

Relasaun ho evidensia hirak ne’e suspeitu sira viola Lei númeru 5/2017, pratika Arma Branka ne’ebé defini iha artigu 2 númeru 1 koalia kona-bá katana, espada no rama ambon. (Editór, Guido Santos).

 

 

Pin It

Follow us on Twitter

Sign up via our free email subscription service to receive notifications when new information is available.