Díli-SMI: Membru Polísia Nasionál Timor-Leste – PNTL liu-hosi servisu sekretu ka’er estudante sekundária hamutuk ema na’in 4 iha área Suku Becora tanba involve krime hodi halo asaltu ema iha fim-semana foin lalais ne’e.
Suspeitu ne’ebé identifikadu nu’udar estudante universitáriu no sekundária ne’e rezidente Aldeia Bekusi Kraik, Suku Becora, Postu Administrativu Cristo-Rei, Munisípiu Díli.
“Liu-hosi Servisu Informasaun Polísia (SIP) Nasionál, halo vizilansia hodi asegura ona joven mane na’in-4 ne’ebe envolve krime jeral ba kazu halo asaltu horikalan tanba tuda vitima sira iha area Amular, Aldeia Bekusi Kraik, Suku Bekora, Postu Administrativu Cristo-Rei, Munisipiu Dili.
“Suspeitu nain 4 ne’e hela hotu iha area Amular, Suku Becora no sira nia identidade mak hanesan, GdC, tinan 19, nudar estudante universitariu no autor prinsipal lori fatuk tuda vitima iha motor leten, FsB, alias M tinan 18, estudante eskola sekundaria, ERMS, tinan 19, no SdS, tinan 19, Estudante Universitariu”, tuir Komuikadu Imprensa PNTL n’ebé SMI asesu foin lalais ne’e.
Imaktu hosi hahalok suspeitu na’in 4 ne’e rezulta ida hetan tuda monu no dadaun hetan tratamentu saúde no vitima na’in rua seluk mak la-heten tuda iha tempu refere.
“Oras ne’e daudaun vitima ida ne’ebe suspeitu sira tuda monu sai hosi motor leten seidauk bele fo deklarasaun tanba kondisaun grave no sei halo hela tratamentu saude,
Vitima nain rua seluk ne’ebe lakona pankada fatuk maka ho naran Elizio Antonio Silva da Costa, tinan 19 ne’ebe lori motor hela iha Aldeia Bekusi Sentru no Higinio da Silva tinan 23, ne’ebe tur iha motor kotuk hela iha Aldeia Bekusi Sentru”. Haktuir komunikadu ne’e.
Suspeitu hirak ne’e ne’ebé parte seguransa (polísia) sira entre ona ba Eskuadra PNTL Cristo-Rei Becora, hodi halo prosesu investigasaun no detein durante 72h tuir lei ne’ebé iha, antes submete ba tribunál hodi tuir porsesu julgamentu. (Edtór, Rui Santos).
