Dili – SMI, VII Governu Konstitusionál liu husi Ministériu Administrasaun Estatal - MAE deside ona kalendariu ba realizasaun eleisaun antisipada iha fulan Maiu tinan 2018, maibe sei hein desizaun Presidente Repúblika atu deside loron fiksu ba eleisaun refere.
“Ami iha ami nia data, maibe ami hakarak husik hela ba Exelensia Prezidente da Repúblika atu pronunsia uniku data ho fulan, ami bele dehan katak eleisaun ne’e halo iha fulan Maiu, maibé data ne’e ami hakarak husik hela ba PR atu dekreta”. Dehan Ministru Estatal Valentim Ximenes ba jornalista sira hafoin remata enkontru ho Presidente Repúblika iha Palasiu Prezidensial Nicolau Lobato, Ai-Tarak Laran, Segunda,(05/02).
Valentim esplika katak kalendariu ne’ebé parte Governu aprezenta ba Prezidente Repúblika ne’e mai husi desizaun koletiva orgaun eleitorál rua maka hanesan Sekretariu Tekniku Administrasaun Eeleitorál – ESTAE no Comissão Nacional de Eleições – CNE maibe presiza rona orientasaun husi PR rasik.
Ministru ne’e mós esplika katak dadaun ne’e halo ona prosesu rekrutamentu ba ofisiál no brigada ESTAE iha munisipiu 13 iha teritoriu laran hodi halo atúalizasaun dadus ka resensiamentu foun iha teritoriu Timor-Leste laran nomós iha estranjeiru antes to’o periodu eleisaun antisipada.
“Ami hahu halo dau-dauk ona rekrutamentu ba ofisiais STAE ninian brigada sira iha Munisipiu tomak teritoriu tomak hahu halo ohin depois de resensiamentu iha rai laran, atu lansa iha Ermera iha Kinta-feira. Semana oin ne’e ami tenki haruka ami nia tekniku ba kedas ona rai liur nomeadamente ba Irlanda, Inglatera, Portugal, Australia, Korea do Sul atu bele atualiza kartaun eleiór’, tenik nia.
Nia esplika katak totál orsamentu ne’ebé sei gasta ba eleisaun antisipada maizumenus hamutuk millaun 5 dollar Amerikanu. (Editor, Mateus Barros).
