Dili-SMI, Bankada opozisaun Partidu Libertasaun Popular – PLP ezije ba Prezidente Parlamentu Nasionál – PPN hodi aslera lalais establesementu Komisaun Permanente – KP maibe PPN Aniceto Guterres hili dalan nonok no seidauk iha sinál atu establese komisaun permanente refere.
Ejizensia kona-ba establesementu KP mai partidu opozisaun liu husi Xefi Bankada PLP, Fidelis Mangalhães ho razaun atu bele fó solusaun ba krize polítika iha rai-laran.
“Husu Prezidente Parlamentu Nasional atu aselera estabelese komisaun permanente hodi solusiona ba krize politika ne’ebe dadaun ne’e ita iha”, dehan Fidelis iha Parlamentu Nasionál, Tersa, (06/02).
Razaun PLP ejize, Fidelis esplika katak tama ona semana rua disolusaun ba Parlamentu Nasionál tuir artigu 86 alinea f, maibe to’o ohin loron seidauk iha komisaun permanente hodi bele konvoka ona ona plenaria iha PN.
Parte PLP rasik hatama ona lista membru komisaun permanente ne’ebé sei hamutuk ho membru KP husi bankada sira seluk iha PN hodi diskute lei sira ne’ebé importante ba nasaun no povu nia interese.
Fidelis mós informa katak jeralmente bankada koligasaun AMP kontinua hala’o atividade enkontru entre bankada AMP hodi haree kona-ba proposta altersaun ba lei sira, liu-liu lei eleisaun nian nomós deslokasaun ba atividade kontaktu eleitorál nian.
“Ami em jeral mai iha Parlamentu ami enkotru bankadas AMP enkontru lor-loron, bankada ida-idak mos enkontru i ami mos hare’e kona-ba proposta alterasoes lei sira ke iha ami diskute ona foin lalais ne’e. Lei ida kona-ba eleisaun nian, iha mós dezlokasaun ba iha kontaktu eleitorál ne’ebé mak la’o hela dadaun”, nia esplika.
Bázea ba ejizensia husi bankada opozisaun nian, SMI tenta hodi konfirma ho PPN maibe lakohi fó ninia razaun tanba saida maka seidauk establese KP to’o ohin loron. (Editor, Mateus Barros).
