Dili – SMI, Konstrusaun estrada dirasaun Ai-Tutu to’o Same Vila ho naruk kilometru 49 ne’e gasta orsan hamutuk millaun 40 no lori tempu durante tinan 3 resin ne’ebé responsabiliza husi Kompañia Tinolina King, sei inagura iha fulan ne’e.
“Estrada diresaun Same Ai-Tutu ho kilometru 26 no husi Same Vila ho kilometru 23, gastu orsamentu ho totál montante miliaun haat nolu, no tuir projetu ne’e halo to’o tinan tolu (3) deit maibé atrazu tanba problema sosiáis no estrada refere sei tau alkatraun iha tempu badak nia laran”, dehan Diretúr Kompañia Tinolina King Agustinho Gomes iha Palasiu Governu, Tersa, (06/02) hafoin halo enkontru ho Primeiru Ministru Mari Alkatiri.
Nia mós esklarese katak tuir lolos estrada ne’ebé gasta ona orsan hamutuk millaun 40 ne’e inagura ona iha tinan kotuk (2017) maibe relasiona ho problema sosiál ne’ebé liga ho komunidade maka foin atu halo inagurasaun, maske projetu rehabilitasaun finaliza ona iha fulan Juñu, tinan kotuk.
“Xefi gabinete marka ona loron 17 de Fevereiru para atu inagura ba konstrusaun estrada ne’ebé atinji ona pursentu 100. Antes ne’e promete atu inagura iha tinan kotuk maibé tamba problema sosiais ho komunidade sira ne’ebé maka hela iha area Same Vila no Same Ai-Tutu hanesan problema ema nia uma, no problema ema nia ai-oan ne’ebé presiza tempu para halo negosiasaun, projetu refere finaliza iha fulan Juño tinan 2017 liu ba”, dehan nia.
Diretúr Kompañia ne’e relata katak dadaun ne’e estrada dirasaun Ai-Tutu ba Same Villa ninia prosesu rehabilitasaun atinji ona 100% no hein atu halo inagurasaun iha tempu badak (17 Fevereiru) husi Primeiru Ministru rasik. (Editor, Mateus Barros).
