Dili-SMI, Partidu politiku sira ne’ebé dadaun ne’e hetan asentu iha Parlamentu Nasionál hanesan Fretilin, PD, PLP, CNRT no KHUNTO konkorda ona ho kalendáriu ba Eleisaun Antisipada – EA ne’ebé parte CNE – STAE aprezenta ba Prezidente Repúblika.
Esteimentu konkordansia ne’e hato’o husi reprezentante kada partidu polítiku hafoin hamutuk ho CNE no STAE halo enkontru ho Prezidente Repúblika iha Palasiu Prezidente Nicolau Lobato, Aitarak-Laran, Kuarta, (07/02).
Partidu Frettilin liu husi Adjuntu Sekretariu Jerál Fretilin José Reis deklara aseita ho kalendáriu ne’ebé STAE no CNE aprezenta ba PR ho ninia data fiksu ba eleisaun antisipada refere.
“Ami laiha objesaun ida, hau hanoin partidus hotu-hotu laiha objesaun ida kona-ba data ne’e hare’e tuir prosedimentu tekniku ne’ebé prepara husi STAE ho CNE hamutuk halo tiha ona reniaun ho PR. Ami hanoin ami laiha objesoes kona-ba loron eleisaun nian”, dehan Reis.
Prezidente Partidu Demokratiku Mariano Asanami Sabino mós deklara prontu simu desizaun data fisku husi PR kona-ba EA.
“Kalendáriu ne’ebé maka iha, PD prontu atu simu kalendariu ne’ebé PR fó”, dehan Mariano.
Iha biban hanesan Prezidente Konsellu Dirativa Nasionál – KDN partidu CNRT Deonisio Babo konkorda ho kalendáriu EA refere maibe presizamente haree didiak kona-ba alokasaun orsamentu ba eventu refere.
“Konkorda ho data refere, maibé presiza mós hare’e didiak ho orsamentu ne’ebé maka aloka ba iha EA ida ne’e. Eleisaun rua Prezidensiál ho parlamentar iha tinan 2017 ita gasta por volta de seis (6) milhões ida hanesan ne’e deit, agora ita gasta dehan katak sinku (5) milhões, ita tenki hare’e didiak, ita hare’e to’ok osan sira ne’e mai husi ne’ebé para ita bele la’o’, dehan Babo.
Parte seluk Prezidente Bankada PLP Fidelis Leite Magalhães mós aseita orariu EA tanba fó tempu ne’ebé naton hodi halo preparasaun ba eleisaun ne’ebé sei garante transpante iha eleisaun refere.
“Ami konkorda ho proposta kalendariu ne’ebe maka ohin CNE aprezenta I ami hanoin data ne’e diak i naton para bele organiza eleisaun ida ne’ebe mós no transparente”, dehan Fidelis.
Parte KHUNTO, Prezidente partidu Armanda Berta dos Santos mós laiha objesaun seluk kona-ba orariu EA refere.
Tuir data fiksu ne’ebé CNE no STAE aprezenta ba PR maka EA sei realiza iha loron 12 fulan Maiu tinan 2018. (Editor, Mateus Barros).
