Dili - SMI, Prezidente Parlamentu Nasionál – PPN, Aniceto Longinhos Guterres konsidera surat “cinta” (proposta) kona-ba atu renova rejimentu ba Komisaun Permanente husi Aliansa ba Mudansa no Progresu – AMP ne’e ilegal tanba laiha legalidade.
Aniceto fó razaun katak dadaun ne’e parlamentu dezolvidu nomós bankada AMP la ejiste iha uma fukun parlamentu nasionál.
‘’Prosesu iha tribunal ne’ebé maka iha bankada AMP ne’ebé iha parlamentu ne’e sira uja lei ou rejimentu no artigu ida ne’ebé maka sira forma bankada ida ne’e. Bankada mós la eziste sé proposta ruma mai husi deputadu sira dehan na’in sanulu resin rua ne’e nia deputadu mai husi bankada ida ne’ebé?”, dehan Aniceto ba SMI iha Uma Fukun PN, Kuarta, (07/02).
Eis Xefi Bankada partidu Fretilin ne’e komenta membru deputadu sira ne’ebé involve komisaun permanente ne’e atu halo fiskalizasaun ba prosesu eleisaun antisipada ne’ebé sei mosu iha tempu badak nia laran. Deputadu sira ne’ebé latama iha komisaun permanente nafatin halo serbisu iha komisaun serbisu espesializada nian.
Hatan ba ejizensia AMP kona-ba mosaun sensura, eis ativista diretus umanus iha tempu Indonesia ne’e argumentu katak laiha razaun fundamentu ba parlamentu dezolvidu atu halo mosaun sensura hasoru governu.
“Kona-ba atu debate mosaun sensura se governu lakohi presenza, halo nusa maka parlamentu dezolvidu bele sensura fali governu, kompetensia sei iha ka lae iha parlamentu para sensura governu ida ne’e se laiha ona kompetensia”, dehan nia.
Iha parte seluk, durante semana ne’e pesoál importante sira iha AMP hanesan Xefi Bankada PLP no CNRT ejize maka’as ba PPN hodi establese lalais komisaun permanente nomós halo ajenda ba plenaria hodi diskute proposta rejimentu foun ba komisaun permanente nian.
Resposta kona-ba PPN nia konsiderasaun proposta AMP ilegal, Prezidenti Bankada CNRT Arão Noe duvida ho kuiñesementu Anieto Guterres kona-ba lei no rejimentu internal PN nian.
“Proposta ne’e la ilegal, prezidenti admiti tiha nusa maka bele illegal entaun prezidente ne’e mós la hatene lei. Prezidente foti vistu admiti tiha agora hein atu ajenda deit, mosaun de sensura hanesan mós proposta ba distituisaun ne’e prezidente admiti tiha ona, se admiti priense nia kriteira, falta deit atu ajenda ba hodi debate i aprova”, dehan Arão. (Editor, Mateus Barros).
