Dili-SMI, Sekretáriu Estadu Juventude no Traballu – SEJT, Nivio Mangahlães afirma katak tratamentu hanesan ba funsionáriu hothotu wainhira uza sala patrimoiu estadu hanesan kareta no motor, sei la perdua funsionáriu ida tanba haree ba koor partidu ka grupu ruma.
"Ha'u sempre hatete, tratamentu hanesan ba funsionáriu hotu, laiha funsionáriu espesiál iha Sekretaria Estadu Juventude no Traballu. Sé mak sala nia tenke hatan no responsabiliza. Labele sala tanba ita kuiñese malu ita perdua malu. Laiha perdua malu bainhira ita koalia kona-ba interese povu, interese estadu nian”, dehan Nivio Mangalhães ba nia funsionáriu sira durante halo inspesaun ba patrimoniu estadu iha Edifisiu SEJT, Kaikoli, Segunda, (05/02).
Razaun husi inspesaun ne’e atu garante utilizasaun patrimoniu estadu tanba ba interese povu no nasaun, tanba tuir Sekretariu Estadu katak durante asumi kargu nu’udar SEJT haree funsionariu barak uza sala patrimoniu estadu nian.
Nia hatutan, tuir nia observasaun durante ne’e hatudu katak mosu injustisa boot entre funsionáriu SEJT ne’ebé simu no uza patrimoniu estadu ho funsionáriu ne’ebé la uza patrimoniu estadu nian.
“Sekretariu Estadu ne'e hatete, inspesaun ne'e halao tanba dezde nia simu mandatu nia observa katak funsionariu barak neebé simu patrimoniu estadu hanesan motor no karreta tama serbisu tarde bebeik. Balun ne'ebé la simu (patrimoniu estadu) tama sedu. Ida ne’e hau hanoin injustisa boot ida”, katak nia.
Durante inspesaun, Sekretariu Estadu ne’e identifika funsionariu balun koko bosok kona-ba kondisaun kareta no motor ne’ebé sira uza. Nia esplika katak funsionáriu balun dehan motor ne’ebé sira uza balun sei iha munisipiu nomós balun sei iha ofisina tanba at.
Ema númeru um iha SEJT ne’e fó ona ultimatum ba funsionáriu sira ne’ebé uza sala patrimoniu estadu atu hatama fila fali patrimoniu estadu iha loron sesta semana ne’e. (Editor, Lariwa).
