Dili-SMI, Membru deputadu husi Aliansa ba Mudansa no Progresu – AMP Maria Terezinha Viegas (CNRT) no Cindy Sandrawaty Verdial (PLP) ne’ebé eleita foin lalais ne’e sei lidera meja Komsaun Permanente – KP iha Parlamentu Nasionál - PN to’o deputadu lejistrasaun foun simu pose.
Rezultadu husi eleisaun, lista pakote unika husi bankada opozisaun ne’e eleita ho votus afavor 19, kontra 7 no abstensaun 3, husi totál membru deputadu 29 ne’ebé tama iha komisaun permanente iha PN.
“Iha eleisaun ne’e ba Sekretária no Vise Sekretaria parlamentu nasionál, partisipa kompletu membru komisaun permanente nomeadu hamutuk na’in 29, afavor 19, kontra 7 no abstensaun 3 hatudu katak proposta lista unika pasa maka Sekretaria Maria Teregina Viegas husi bankada CNRT no Vise Sekretária Cindy Sandrawaty Verdial husi PLP”, Prezidente PN Aniceto Guterres, Kinta, (08/02), iha uma fukun PN.
Anteriormente, lidera husi membru deputada koligasaun Fretilin – PD hanesan Sekretária meja maka deputada Lidia Norberta (Fretilin), Vise Sekretári I maka Elvina de Carvalho (PD) no Vise Sekretária II maka Maria Anjelica (Fretilin) to’o Prezidente Reúblika dezolve PN iha loron 26 fulan Janeiru liu ba.
Konstituisaun Repúblika Demokrátika Timor-Leste – KRDTL artigu 102 mensiona katak komisaun permanente ne’e funsiona wainhira periodu resesu, PR dezolve PN no kazu seluk sira ne’ebé temi ona iha lei inan rasik.
Komisaun Permanente tuir KDRTL artigu 102 aline 3 katak akompaña serbisu sira Governu nian nomós administrasaun, kordena serbisu sira komisaun nasionál nian, promove konvokasaun parlamentu nasionál, prepara no organza parlamentu nasionál nia sesaun sira, autoriza dezlokasaun PR, lidera parlamentu nasionál nia relasaun ho parlamentu nasionál rai seluk, Autoriza estadu serku no no estadu emerjensia.
Proponente husi lista pakote uniku ne’e maka hanesan Arão Noe, Mericio dos Reis, Armanda Berta dos Santos, Fidelis Leite Magalhaes, Maria Fernanda Lay, Virgina Ana Belo, Deonisio Babo Soares, Carmelita Caetano Monis, Brigida Antonio Coreia no Duarte Nunes. (Editor, Lariwa)
