Dili-SMI, Prezidenti Tribunál Rekursu Deolindo dos Santos deklara katak relasiona ho pedidu Primeiru Ministru Mari Alkatiri kona-ba auditoriu ba projetu sira, Tribunál Rekursu liu husi Kamara Kontas halo ona planu atu halo auditóriu ba projetu ZEEMS iha tempu badak nia laran.
Deolindo esplika katak ninia parte simu ona karta husi PM kona-ba auditória maibe konteudu karta ne’e husu atu halo auditória ba projetu ZEEMS deit.
“Los duni katak iha mídia sosiál hotu-hotu koalia katak auditoria-auditoria mais, saida maka akontese? katak iha duni pedidu ida mai husi Primeiru-Ministru atu halo auditória, mas pedidu Primeiru-Ministru nian ne’e kona-ba atu halo auditória ba ZEEMS, ida ne’e maka tama i tribunál sei haree ida ne’e”, dehan Deolindo iha Palasiu Prezidensiál Aitarak-Laran, Segunda, (12/02) hafoin hasoru malu ho Prezidente Repúblika.
Prezidente Tribunál Rekursu mós dehan katak tribunál sei ezerse nia kompetensia nu’udar Tribunal hanesan kamara Kontas hodi tau planu serbisu hodi nune’e bele halo auditória ba ZEEMS tuir pedidu PM nian.
Maibe, nia mós esplika katak prosesu auditória ne’e sei depende ba planu anual Kámara Kontas nian ne’ebé aprova tiha ona iha plenaria Tribunál Rekursu nian.
“Depende ba posibilidade no planu Tribunal Rekursu nian tamba Tribunal Rekursu liu husi Kamara Kontas iha ona planu annual, Tribunal Rekursu maka sei asumi kna’ar hanesan Tribunal Kontas hodi halo auditoria, maibé sei la’o tuir mós planu anual Kamara Kontas ne’ebé maka aprova ona iha Plenaria Tribunal Rekusu nian”, dehan nia.
Nia hatutan tan, PM Mari Alkatiri deklara tiha ona katak sei halo auditória ba ZEEMS, Finansas Públiku, Turizmu no Infra-estrutura, maibe to’o ohin loron tribunal simu deit karta ida kona-ba auditória ba ZEEMS.
Primeiru Ministru Mari Alkatiri rasik hatama pedidu ba Tribunál Rekursu hodi husu auditória iha inisiu fulan Fevereiru tinan ida ne’e. Planu aditória ne’e rasik hetan apresiasaun pozitivu husi públiku tanba nu’udar inisiativa diak atu harii transparansia no boa governasaun iha Timor-Leste. (Editor, Mateus Barros).
