Dili - SMI, Maske sei iha prosesu negosiasaun, maibe atual Primeiru Ministru Mari Bin Amude Alkatiri fó ona kompeténsia ba Ministru Adjuntu Primeiru Ministru ba Delimitasaun Fronteira, Hermenegildo Augusto Cabral Pereira hodi reprezenta estadu Timor-Leste atu asina tratadu tanba hakarak kadoras mai iha Timor-Leste.
“Hau mak asina mandatu ida para fó kompetensia ba Ministru Agio para bele asina, signifika aseita no hau hakarak dada mai timor”, dehan PM Mari Alkatiri ba jornalisra sira hafoin remata enkontru ho Prezidente Repúblika iha Palasiu Prezidensiál Aitarak-Laran, Kinta, (15/02).
Mari Alkatiri mós esplika katak dadaun ne’e seidauk serteza lolos atu dada kadoras mai Timor-Leste ka dada ba Australia. Tanba 20 Marsu maka sei hasoru malu fila fali iha Malaysia hodi kontinua ba iha Nova Yorke hodi koalia no deside kona-ba ida ne’e.
“Seidauk deside atu mai Timor ka atu ba Australia. Iha 20 Marsu maka hasoru malu fali iha Malaysia antes ba Nova Yorke”, tenik Sekretariu Jerál Fretilin ne’e.
Xefi Governu ne’e mós esplika katak konkorda ho 70% dada kadoras mai Timor-leste no 80% ba Australia tanba ne’e nia lori ba Konsellu Ministru hodi deside Ministru Agio Pereira atu asina kona-ba tratadu ne’e.
“Hau uluk kedas hanoin katak 100% ita la konsege, hau nunka mehi to’o 100%. 70%) kuandu mai timor, 80% kuandu ba Australia. Hau mak asina mandantu ida ba Ministru Agio Pereira para asina”, dehan Alkatiri.
Maske nune’e, polítika Governu dada kadoras mina mai Timor-Leste ne’e, tuir sosiadade sivil hanesan La’o Hamutuk katak Governu presiza halo estudu didiak kona-ba kustu no benefisiu husi dada kadoras ne’e rasik, antes foti desizaun finál. (Editor, Mateus Barros).
