Dili-SMI, Diretór Klinika Bairopite, Daniel Murphy hateten Timor-Leste labele dependente bebeik ba profisionál saude (doutor) husi estranjeiru maibe oinsa hahu valoriza ona profisionál saude timoroan rasik ne’ebé iha kapasidade no didikasaun atu serbi nasaun no povu.
Tanba ne’e, durante ne’e nia uza profisionál saude timoroan hodi atende pasiente sira ne’ebé tama iha klinika Bairopite.
“Tanba ne,e maka hau labele fo deit oportunidade ba malae hodi hare’e maibé agora hau iha hanoin tenke fo oportunidade ba doutor timor oan sira, atu bele hamrik mesak ne’e hanoin fundamental ba timor oan”, dehan Murphy ba SMI, Kuarta, (14/02).
Wainhira SMI husu kona-ba moras mal-nutrisaun nian, Murphy resposta katak:
“kona-ba moras mal-nutrisaun ne’ebé mosu la’os ha-han maka laiha, maibe laiha sosializasaun ne’ebé diak ba komunidade sira, hanoin deit fó sasoro tanan deit diak ona maibé lae, depois maka falta vitamina, proteina no falta Goldura”.
Doutor Murphy mós relata katak durante klinika Bairopite hetan difikuldade ba aimoruk no ekipamentu importante sira hodi apoiu ninia serbisu hodi salva timoroan ne’ebé moras.
Nia esplika durante ne’e klinika Bairopite hetan ajudasaun aimoruk husi SAMES maibe la sufisiente tanba volume pasiente kada loron liu ema na’in 300 ne’ebé halo tratamentu iha klinika refere.
