Dili-SMI, Hodi garante kualidade Eleisaun Antisipada tinan ida ne’e, Governu liu husi Ministériu Administrasaun no Estatal ho Ajensia UNDP asina ona akordu hodi sosa tinta hamutuk botir Rihun Hat (4000) iha nasaun India ho montante orsamentu hamutuk $. 150 mill USD.
Ministru Administrasaun no Estatal Valentim Ximenes katak akordu ho parseiru UNDP ne’e atu asegura kualidade, akizisaun ba tinta ne’ebé ho presu diak nomós halo akizisaun lalais ne’ebé bele garante EA ne’e ho diak.
“Ida mak kualidade ne’e iha tinan kotuk ema hotu-hotu dehan kualidade ho tinta ne’ebé kapas, daruak tamba nia presu ne’e diak teb-tebes la karun liu, la baratu liu no datoluk mak akizisaun lalais, ita iha fulan ida nia laran ne’e ita bele hetan tinta too ona mai Timor”, hateten Ministru ne’e.
Nia hatutan katak akizisaun ba tinta sosa iha rai liur, Governu uza prosedimentu aprovizionamentu husi programa ba Nasoes Unidas iha Timor-Leste hanesan ajensia UNDP.
Diretór UNDP iha Timor-Leste Claudio Providas katak akordu ne’e hanesan koperasaun diak entre governu no programa nasoes unidas hodi garante eleisaun antisipada ne’e ho diak
“Ami fiar katak ba eleisaun antisipada ne’e ho estimasaun ba sosa tinta hamutuk botir 4000 ho orsamentu mil 150 dollar ne’e bele sufiente hodi transporta tinta too mai Timor, durante loron haat nulu”, Esplika Claudio
Parte orgaun eleitorál, Diretor STAE Acilino Manuel Branco apresia tebes ba akordu kona-ba akizisaun tinta nu’udar parte ida importante atu halo kontrolu ba prosedimentu eleitorál tomak eleisaun nian, liu-liu ba partisipasaun votantes sira iha prosesu votasaun.
Iha fatin hanesan Diretór Jerál CNE Bernado Zebedeu hateten ho esperansa tomak tinta ne’ebé sosa husi UNDP sei mai ho kualidade ne’ebe diak. (Mateus Barros).
