Dili-SMI, Atu hametin independensia redasaun iha ambiente polítika hodi hasoru Eleisaun Antisipada – EA mak Konsellu Imprensa – KI organiza enkontru ho xefi redasaun no editor husi kanál mídia sira iha rai-laran.
Prezidente KI Virgilio Guterres hateten objetivu husi enkontru ne’e atu fahe informasaun ba xefi redasaun no editor meus komunikasaun sosiál hodi bele kontinua hametin no garante independensia redasaun durante eleisaun antisipada hodi nune’e bele fó informasaun ne’ebé kualidade ba públiku.
“Atu fahe informasaun ba públiku liu-liu ba Xefi redasaun, editor no meus komunikasaun sosiál sira atu oinsa kada xefi redasaun ida-idak hodi halo preparasaun diak ba nia án atu infrenta situsaun kona-ba eleisaun antisipada mai ne’e”, dehan Prezidente KI Virgilio iha Salaun Fundasaun Oriente, Sesta, (16/02).
Virgilio mós kontinua fó korajen ba xefi redasaun no editor sira husi kanál mídia imprime, tarnsmisaun no online sira atu mantein integridade polítika redasaun hodi orienta jornalista sira halo kobertura durante periodu kampaña eleitorál.
Iha biban hanesan Diretór Radio Timor Kmanek - RTK Bento Barros Pereira ne’ebé sai orador iha sorumutu entre KI ho xefi redasaun no editor sira hateten katak mídia Timor-Leste dadaun ne’e hetan obstaklu boot oinsa atu asegura interese públiku tanba dala-barak hetan presaun husi poder polítika no poder ekonomiku.
“Defaktu ohin loron iha Timor Leste akontese duni, no agora oinsa ita bele atu asegura indepedensia mídia atu sira bele hala’o sira nia serbisu defende intrese publiku nian. Realidade hatudu katak iha poder sira seluk ne’ebé halo presaun”, dehan Bento durante ninia sesaun aprezentasaun.
Diretór ne’e mós fó korajen ba xefi redasaun atu kontinua mantein independensia hodi nune’e bele fó informasaun ba públiku ho kualidade no loloos.
Iha parte seluk, jornalista senior Otelio Ote ne’ebé partisipa iha sorumutu ne’e hateten katak enkontru entre KI ho xefi redasaun no editor sira ne’e importante tebes hodi bele ajuda polítika redasaun meus komunikasaun sosiál iha rai-laran.
Maibe, Ote rekomenda ba KI atu muda ambiente enkontru la’os deit iha hotel maibe bele vizita ba kanál mídia sira hodi fahe informasaun kona-ba asuntu redasaun nian. (Editor, Mateus Barros).