Dili – SMI, Komunidade iha kapitál Dili konsidera hahu husi Governu anterior to’o ohin loron falla hodi rezolve problema lixu ne’ebé durante ne’e sai preokupasaun ba públiku, tanba fo impaktu ba ambiente iha sidade laran.
Mendes dos Santos Castro nu’udar estudante UNDIL ne’ebé hetan intervista husi SMI hateten atu reduz ka rezolve problema lixu maka Governu presiza kria polítika jestaun ba lixu iha kapitál Dili.
“Nai ulun sira bele hare didiak buat sira ne’ebé maka iha Dili laran, no foer sira ne’ebé maka soe arbiru iha fatin públiku. Husu ba nai ulun tenki tau atensaun ba fatin sira ne’ebé maka iha Dili laran atu nune’e kapitál Dili sai mós no seguru”, Mendes foin lalais ne’e iha kapitál Dili.
Iha biban seluk Manuel Hornai nu’udar vendedor iha area Taibesi haree katak problema lixu iha kapitál Dili la’os deit falla jestaun husi Governu maibe mós komunidade barak ladauk iha konsensia hodi soe lixu iha fatin ne’ebé lolos.
Ho nune’e husu ba komunidade atu labele soe foer arbiru hodi prejudika ba ambiente furak iha sidade Dili nian.
“Husu ba komunidade atu kuidadu soe foer hanesan Aqua, plastik no seluk-seluk tan hodi soe arbiru maka bele fo impaktu ba bé sai nalihun iha fatin públiku”, dehan Manuel.
Haree husi impaktu negativu ne’e, Manuel husu ba estadu atu kria kontrolu ne’ebé efetivu hodi bele reduz problema lixu iha Timor-Leste, liu-liu iha kapitál Dili.
Hatan ba preokupasaun hirak ne’e, Xefi Departementu Dirasaun Saneamentu Munisipiu Dili, Domingos dos Santos fó argumentu katak sidadu Dili kontinua nakonu ho lixu to’o loron tanba komunidade soe foer arbiru.
Nia hatutan Dili nu’udar kapitál nasaun ne’ebé sai sentru ba atividade hothotu hanesan negosiu, eskola no seluk tan sai fatór ida ne’ebé kontribui mós aumenta lixu iha sidade Dili.
“Komunidade barak mai husi Munisipiu 12 inklui Rejiáun Autonomu Espesiál Oe-Cusse ne’ebé halo negosiu iha Dili, nomos estudante barak husi foho mai kontinua sira nia estudu hanesan Ensino Sekundariu, Universidade iha sidade halo sidade dili sai nakonu ho ema enatun konserteja ema barak lixu mós barak”, dehan nia.
Nia hatutan katak atu minimiza ka reduz lixu parte Governu fo sai ona avizu ba komunidade nomós negosiante sira iha kapitál Dili hodi soe lixu iha fatin ne’ebé prepara ona husi Governu iha estrada públiku nomós iha bairo sira Dili-laran.
Tuir observasaun SMI katak kuaze bairo Dili laran nakonu ho lixu inklui area turistiku hanesan Kristu Rei nomós jardim sira iha kapitál Dili. (Editor, Lariwa).
