Dili-SMI, Prezidente Bankada FRETILIN, Francisco Miranda Branco hateten programa VII Governu Konstitusional sai nu’udar programa kampaña ne’ebé partidu istoriku ne’e uza durante periodu kampaña eleitorál iha Eleisaun Antisipada.
Razun fundamentu husi partidu FRETILIN hodi lori programa VII Governu konstitusionál ba fali povu durante periodu kampaña tanba konsidera programa refere pro ba dezenvovlimentu sustentavel ba povu.
“Programa ida ne’e define tiha ona iha rezultadu konferensia nasionál tamba programa setimu governu ida ne’e maka hetan rejeisaun husi Parlamentu Nasional husi oposisaun sira. Programa ida ne’e pro dezenvolvementu sustentavel, pro kontinuasaun ba hadi’a kualidade ne’ebé diak liu tan hodi hamoos buat ne’ebé lalos”, dehan Branco iha Parlamentu Nasionál, Segunda, (19/02).
Branco hatutan dezisaun hodi lori programa VII Governu nia sai produtu kampaña eleitorál ne’e deside iha konfrensia nasionál partidu FRETILIN foin lalais ne’e iha Munisipiu Bobonaro, postu Administrativu Maliana.
Deputadu FRETILIN ne’e mós hatutan katak maske programa VII Governu ne’e hetan rejeisaun husi opozisaun iha Parlamentu Nasionál maibe polítikamente sai nu’udar refrendu hodi lori ba povu atu haree ba programa refere liu husi desizaun eleisaun antisipada.
“Hetan rejeisaun husi oposisaun ida ne’e mak ami sei lori I politikamente ami dehan ida ne’e hanesan referendu ida lori fali ba povu hodi hare programa ne’e”, tenik Branco. (Editor, Mateus Barros).