Dili-SMI, Prezidente Bankada FERTILIN, Francisco Miranda Branco esplika katak lider partidu FRETLIN no PD konkorda hamutuk ona hodi fahe malu durante periodu kampaña eleitorál tanba ho ninia prinsipiu no identidade polítika partidu nian maibe sei hamutuk hodi harii Governu bainhira iha ona rezultadu eleisaun antisipada.
“Ami mós reuni tiha ona katak kampaña Partidu Demokriku sei la’o idak-idak nian, iha akordu de baze sei komunika bainhira rezultadu eleisaun sai tiha ona koliga atu forma governu, maibé agora ne’e idak-idak la’o ninian tamba tuir identidade idak-idak nian, ida ne’e maka desisaun husi lideransa partidu rua nian”, dehan Branco iha uma fukun Parlamentu Nasionál, Segunda, (19/02).
Branco hatutan katak relasiona ho desizaun lider partidu rua hodi fahe malu durante periodu kampaña eleisaun antisipada maka FRETILIN deside halo ona konfrensia nasionál hodi hametin diak liu tan estrutura partidu nia iha báze.
Nia mós aumenta tan katak partidu FRETILIN deside hodi halo konfrensia nasionál ne’e atu define kriteria sira bázea ba kumprimentu lei partidu nian hodi nune’e halo rejistu hodi sai nu’udar kandidatu ba eleisaun antisipada.
“Ami husi partidu FRETILIN hala’o tiha ona ami nia konferensia nasional, agora husi partidu PD la kleur tan sei hala’o konferensia mós, atu nune’e bele iha kriteiru, kriteiru ne’e tuir kumprimentu lei partidu nian atu bele halo registu atu tama ba kandidatu ba eleicões antisipadas iha tinan 2018”, dehan nia.
Antes ne’e mós prezidente partidu PD Mariano Sabino mós deklara ona públiku liu husi mídia nasionál katak PD sei avansa mesak iha eleisaun antisipada. (Editor, Mateus Barros).
