Dili-SMI – Polisia Nasional Timor Leste (PNTL) sei fó seguransa espesiál ba lideransa nasionál sira ne’ebé sei tuir atividade Kampaña eleitorál iha Eleisaun Antisipada hahuú husi Kampaña eleitorál to’o anúnsia rezultadu eleisaun.
Lia hirak neé hato’o husi Ministru Defeza no Seguransa José Agustinho Sequira Somotxo hafoin hasoru malu ho Prezidente Repúblika Francisco Guterres Lú-Olo iha Palasiu Prezidensiál Aitarak-Laran Dili foin lalais ne’e.
“Eleisaun antisipada ne’e sei tau mos prioridade seguransa ba lider nasionál sira hodi asegura ameasas ba lider hirak iha periodu kampaña, no evita mos kazu sira hanesan iha 2007”, Governante ne’e haktuir.
José Agustinho Sequira Somotxo esplika, modelu seguransa sei iha diferente, atu nuneé Líder sira bele livre hodi hato’o programa partidu nian ba povu iha Ambítu eleisaun antisipada.
“Hau nia preokupasaun mak labele akontese hanesan “Kuda Lay” ne’e barak iha Timor Leste tomak”, MDS haktuir.
Governante ne’e esplika ezemplu seguransa tempu funu nian nebe’e hetan asegura seguransa husi povo rasik liu husi Justisa popular.
Entertantu Ministru Defeza no Seguransa José Agustinho Sequeira Somotxo mós rejeita atu atu anunsia kuantidade pesoál seguransa ba líder nasionál sira tamba konsidera nu’udar segredu seguransa. (Editor, Konusere).
