Dili-SMI, Prezidente Repúblika Francisco Guterres Lú Olo husu ba veteranu no kombatente libertasaun nasionál sira ne’ebé sei moris atu kontinua ho komitmentu hodi serbi nasaun ho fuan no domin.
Xefi Estadu hato’o lia hirak ne’e iha abertura primeiru konfrensia kona-ba re-organizasaun nasionál rejistensia iha Centro Convensões Dili – CCD, Sexta, (02/03) semana kotuk.
Lú Olo katak veteranu no kombatente libertasaun nasionál sira nia luta ba independensia nasionál nu'udar istoria importante ne’ebé presiza valoriza no tane as tanba sosa ho sira nia vida.
“Martires, veteranu no kombatente sira, hakerek mai iha tinan 24 funu ba libertasaun. Sira hakerek istoria ne’e ho lolos no aten brani, no matenek liu-liu sira servisu ho isin ho klamar tomak, no la hein iha futuru ema sei selu fila fali sira nia sakrifisiu”, dehan eis Prezidente Parlamentu Nasional I lejislatura ne’e.
Forsa Armada Libertasaun Nasional Timor Lorosae – FALINTIL. Foto, internet
Fundador nasaun ne’e kontinua fo hanoin ba povu Timor-Leste katak maske dadaun ne’e era globalizasaun nian maibe presiza respeita no valoriza nafatin heroi sira nia luta ba libertasaun nasionál.
Iha fatin hanesan Sekretariu Estadu ba Asuntu Veteranu Andre da Costa Belo “L4” esplika katak primeiru kongresu re-organizasaun nasionál rejistensia sai nu’udar determinante ba luta libertasaun nasional. Iha ne’ebé loron 3 Marsu iha ninia istoria rasik ba ukun rasik-an.
”Primeiru konferensia hodi determina re-organizasaun no transformasaun forsa armada hodi luta hasoru inimigu ka invazores, loron 3 fulan marsu iha nia istoria rasik’, dehan L4.
Nia hatutan loron veteranu nu’udar loron importante tebes ba istoria povu Timor-Leste. Tanba ho primeiru kongresu ne’ebé lidera husi Kay Rala Xanana Gusmão ho kudru militante sira ne’e maka hahu luta hasoru invazor to’o referendum 1999 hodi hetan independensia.
Ho nune’e, eis lider klandestina ne’e husu ba veteranu, partidu polítiku no ba povu tomak atu serbisu hamutuk hodi kria unidade nasionál ba interese povu no nasaun. (Editor, Lariwa).
