Dili-SMI, Premiadu Nobel da Paz no eis Prezidente da Republika José Manuel Ramos Horta husu Prezidente Repúblika (PR) Francisco Guterres Lú Olo atu fo indultu ba prizoneiru sira iha prizaun Bekora no Gleno tanba besik ona loron boot nasionál 20 Maiu no 28 Novembru tinan ida ne’e.
“Hau mai hasoru PR asuntu ida deit, prezidente mos kompriende uluk kedas hau nia preokupasaun kona-ba prosesu indultus ba sira prezoneiru iha Gleno no Bekora, hau mai foti problema ne’e ho Prezidente da Republika tamba maiu besik mai dadaun ona”, dehan Horta ba jornalista sira hafoin hasoru malu ho PR iha Palasiu Prezidensiál Aitarak-Laran, Kuarta, (07/03).
Ramos Horta relembra katak iha tempu eis Prezidente Repúblika Taur Matan Ruak konsege fó deit indultu ba ema na’in lima deit, iha ne’ebé sai preokupasaun nu’udar pesoál premiadu novel da paz nian.
Tuir eis Ministru Negosiu Estranjeiru no Primeiru Ministru ne’e katak indultu nu’udar diretu konstitusional ne’ebé fó obrigasaun ba PR atu foti desizaun hodi hakman kastigu dadur sira ne’ebé durante ne’e simu ona sentensa iha prizaun hanesan suai, Gleno no Bekora.
Nia esplika katak Prezidente Repúblika iha sinál konkorda ho ninia proposta fó indultu ba prizoneiru sira maske ne’e kompetensia xefi estadu halo estuda no konsulta ho Ministra Justisa antes foti dezisaun hodi fó indultu ba dadus sira iha loron boot nasionál nian.
“Hau kontente ke prezidente da republika konkorda los ho hau, entermus de filosofia konseitu ne’e los, Prezidente hare’e, Prezidente atu estuda dau-daun I buat sira ne’e liu husi Ministeriu Justisa”, dehan Horta
Atual Ministru Estadu no Konselleru Seguransa Nasional ne’e mós koalia ona diretamente ho Ministra Justisa kona-ba asuntu indultu ne’e rasik. (Editor, Lariwa).
