Dili-SMI, VII Governu Konstitusional liu husi Primeiru Ministru Mari Bin Amude Alkatiri kongratula ba ekipa negosiador ba asuntu delimitasaun Fronteira Maritima ne’ebé lidera husi Kay Rala Xanana Gusmão tanba konsege ona asina akordu fronteira maritima entre Timor-Leste ho Australia.
“Hau fo parabens ekipa negosiador liu-liu ba irmão Xanana, iramão Agio Prereira husi nia ekipa tamba konsege duni iha tempu badak lori akordu ne’e”, dehan Mari Alkatiri iha Edifisiu RTTL, Tersa, (06/03) wainhira remata intervista programa eskluzivu nian.
Xefe Governu ne’e hatutan katak liu husi asina akordu fronteira maritima ne’e fó responsabilidade boot ba Governu atu asegura area tasi-timor husi ameasa no movimentu ilegal sira.
Nia aumenta katak atu garante siguransa iha area tasi timor ne’ebé partense ba fronteira maritima Timor-Leste nian maka presiza iha rekursu ne’ebé sufisiente ba instituisaun Falintil-Forsa Defeza Timor Leste – F-FDTL no Polisia Nasional Timor Leste – PNTL hodi bele halo kontrolu ho efetivu.
“Hau hateten ne’e tenki reforsa ba timoroan hotu hotu labele ba luku tasi defende ita nia fronteira. Entaun ita tenki aumenta kapasidade ba ita nia forsa, ba ita nia polisia. Ita tenki mós iha aviaun balun para tenki semo iha ita nia fronteira maritima nia leten”, dehan nia.
Tuir PM Alkatiri katak depois rezultadu asina akordu fronteira maritima, Timor-Leste simu responsabilidade boot atu asegura no proteje. Tanba ne’e presiza iha planu dezenvolvimentu ba forsa no polisia atu nune’e bele asegura soberania tasi-timor.
Asina akordu ne’e reprezentante Governu Timor-Leste mak Vice Ministru ba Primeiru Ministru ba Delimitasaun Fronteira, Hermengildo Pereira no reprezentante Governu Australia mak Ministra Negosisu Estranjeirus Julie Bishop ne’ebé asiste diretamente husi Sekretáriu ONU António Guterres. (Editor, Lariwa).
