Dili-SMI, Autor kontentor 9 ne’ebé nu’udar sidadaun Indonezia ho insiál MK ne’ebé Polisia Nasional Timor Leste – PNTL kaptura iha fulan kotuk halai ona sai husi teritoriu Timor-Leste semana ne’e.
Relasiona ho kazu refere, sosiadade sivil Fundasaun Mahein – FM husu ba Ministériu Públiku – MP no tribunál atu hasai mandadu kapturasaun hodi nune’e bele buka tuir paradeiru autor refere.
“Ha’u hanoin katak sira halai ona MP no tribunál tenki hasai ona mandadu ruma hodi buka tuir. Portantu hatudu katak sira atu halai husi justisa ba kazu ne’e, mesmu kazu hirak ne’e sei faze investigasaun”, dehan Diretúr Ezekutivu FM, Nelson Belo ba SMI, Kuarta, (06/03) foin lalais ne’e nia serbisu fatin, Fomentu I.
Materia prima ne’ebé wainhira hatun husi kontentor. Foto, Relatoriu FM.
Tuir Diretúr FM katak kazu autor ne’ebé lori bomba kontentor 9 ne’ebé halai husi Timro-Leste nu’udar asuntu seriu no grave tebes. Tanba ne’e, nia husu ba instituisaun judisiáriu no seguransa atu responsabiliza hodi buka tuir.
Nia mós perokupa ho desizaun tribunál ne’ebé iha primeriu instansia aplika termu rezidensia maske autor sidadaun Indonesia ne’e rasik laiha rezidensia permanente iha Timor-Leste.
“Tribunal aplika termu rezidensia ba autor sira maibe autor hirak la iha rezidensia permanente iha Timor, tan ne’e autor sira bele halai sai”, katak nian ho espresaun preokupa.
Iha parte seluk, Adjuntu Prekuradoria Ministériu Públiku Zelia Trindade esplika katak parte MP seidauk simu informasaun ruma kona-ba autor kontentor 9 matéria bomba ne’ebé hala ona sai husi teritoriu Timor-Leste.
“To’o agora MP seidauk iha informasaun ruma, Imi hatene ona, entaun imi aguarda oituan, la’os dehan sai kona-ba ami nia atuasaun, bainhira ita alerta iha jornál sira ne’e, depois ema bele hatene ema bele halai hotu”, Zelia argumenta.
Relasaun kazu refere, Diretúr Ezekutivu Judicial System Monitoring Program – JSMP Luis de Oliveira Sampaio ba mídia nasionál sira katak autor kazu kontentor 9 bomba halai sai husi Timor-Leste tanba frakeza husi sistema judisial iha Timor-Leste. (Editor, Lariwa).
