Dili-SMI, Hodi valida akordu Fronteira Maritima – FM ne’ebé foin lalais asina ona entre Timor-Leste no Australia iha (06/03) foin lalais iha Nova Yorke, presiza hetan ratifikasaun husi Parlamentu Nasionál - PN, maibe asuntu ne’e sai pro-kontra iha PN.
Tuir membru PN Jose Agustinho katak PN presiza tebes halo ratifikasaun ba akordu FM ne’ebé asina ona husi nasaun rua maibe depende ba vontade lideransa masimu orgaun lejizlatura nian.
“Ita hotu hatene Parlementu Nasionál dezolvidu mais asuntu sira hanesan ne’e bele kria plenária para ita bele ratifika ba ita nia susesu, agora ida ne’e fila fali ba vontade diak husi Prezidente Parlamentu Nasionál Aniceto Guterres”, dehan deputadu KHUNTO Jose Agustinho ho lamenta.
Nia haktuir katak membru Komisaun Permanente PN husi bankada lima iha inisiativa maibe Prezidente PN sempre ses an husi no desvia plenária no laiha inisiativa atu atu halo ratifikasaun ba akordu FM ne’e rasik.
Resposta ba hanoin husi deputadu Bankada KHUNTO ne’e, Prezidente Parlamentu Nasionál-PPN Aniceto Guterres deskonkorda tanba prosedementu ratifikasaun ba akordu FM ne’e la’os PN mak halo planu maibe presiza pedidu husi Governu karik konsidera nesesidade tebes atu ratifika.
“Atu halo ratifikasaun la’os Parlamentu Nasionál mak planu, ratifikasaun ne’e tenke rekere mai husi Governu, Governu husu tanba iha praju limite ruma tenki kumpri, hafoin halo ratifikasaun”, dehan Aniceto Guterres hodi kontra argumentu deputadu KHUNTO ne’e.
Deputadu bankada Fretilin ne’e mós klarifika katak seidauk iha pedidu ruma husi parte Governu ne’ebé dirije ba PN hodi husu atu halo ratifikasaun ba akordu Fronteira Maritima nian.
“Ate oras ne’e parte governu mós seidauk haruka karta ruma mai iha meja Parlamentu Nasionál para atu halo ratifikasaun”, katak nia.
Tuir observasaun SMI durante ne’e katak públiku husu ba Parlamentu Nasionál atu ratifika lalais akordu fronteira maritima nian, hanesan Movimentu Kontra Okupasaun Tasi Timor – MKOTT no sosiadade sivil sira seluk. (Editor, Lariwa).
