Dili-SMI, Comissão Nacionál de Eleições – CNE dadaun ne’e identifika ona Partidu Polítiku – ParPol balun hahu ona pre-kampaña hanesan taka imblema partidu iha fatin públiku no halo konsolidasaun militante no simpatizante iha sede partidu, maske seidauk tama ba loron kampaña eleitorál nian.
Deklarasaun ne’e hato’o husi Prezidente CNE, Alcino Araújo Barris liu husi Konfrensia Imprensa iha Salaun Lalini-Larigutu, Tersa, (13/03).
Prezidente CNE deklara katak iha Munisipiu Manufahi identifika partidu balun ka elementu husi Frente Dezenvolvimentu Demokrátiku – FDD hahu taka ona imblema ka atributu koligasaun iha fatin públiku sira.
“CNE informa ona ba partidus politikus sira hanesan partidu balun uza ou elementus balun uza atributu Frente Dezenvolvimentu Demokratiku (FDD) iha manufahi ne’eba lori taka stiker. Ami hatene katak taka stiker sira ne’e iha los sinais tranzitu fatin ne’ebé la apropriadu para atu taka stiker”, dehan Alcino.
Alcino Barris mós reklama katak partidu FRETILIN mós hatama keixa ba CNE hasoru Aliansa Maioria ba Progresu – AMP tanba hahu ona halo kampaña eleitorál ka halo propaganda eleitorál iha kapitál Dili.
“Kontestasaun ne’ebé mak CNE simu, simu husi partidu FRETILIN ne’ebé kontesta Aliansa Mudansa ba Progresu (AMP) katak oras ne’e dadauk halo ona kampaña eleitorál ou propaganda eleitorál ba públiku maibé konfirmasaun ne’e halo durante enkontru iha justifikasaun husi AMP katak sira halo konsolidasaun iha sede no ba sira nia militantas no apoiantes sira”, Barris klarifika.
Eis Ministru Interior mós fó atensaun ba partidu polítiku sira atu labele halo propaganda eleitorál wainhira seidauk to’o kalendariu kampaña eleitorál nian. Maibe wainhira partidu polítika viola no CNE identifika maka sei halo prosesu investigasaun no husu Polisia Nasional Timor Leste – PNTL halo kapturasaun.
Tuir kalendariu nasionál katak kampaña eleitorál ba eleisaun Antisipada ne’ebe sei monu iha loron 09 Abril to’o loron 09 fulan Maiu, tinan ida ne’e. (Editor, Mateus Barros).
