Dili-SMI, Ministru Defeza no Seguransa – MDS, José Sequiera “Somotxo” katak maske iha ona desizaun permanente entre Timor-Leste ho Australia kona-ba Fronteira Maritima – FM maibe mós sai reponsabilidade boot ba Timor-Leste atu asegura.
Ministru Defeza no Seguransa ne’e hateten maske instituisaun milítar no polísia sei menus fasilidade no ekipamentu sira hodi seguransa ba Fronteira Maritima maibe sei esorsu no buka meus hodi halo kontrolosaun masimu iha area tasi-timor.
“Ita hotu hatene katak ita la iha buat ida para asegura fronteira maritima, tan ida ne’e mak MDS ninia preokupa bo’ot no hato’o ba Primeiru Ministru ho Prezidente da Republika, ohin mós hau lori proposta mai hato’o kona-ba konstrusaun ro’o militar para atu garante seguransa ba ita nia FM”, dehan Somotxo ba jornalista sira hafoin hasoru malu ho Prezidente Repúblika iha Palasiu Prezidensiál Aitarak-Laran, Tersa, (13/03).
Eis guerileiru ne’e hatutan instituisaun milítar no polísia sempre prontu hodi asegura soberania tasi timor ne’ebé Timor-Leste manan ona liu husi prosesu asina akordu entre nasaun rua iha Nova Yorke, iha loron 06 Marsu foin lalais ne’e.
“Ita nia Fronteira Maritima ohin loron ne’e depois de asinatura iha loron 06 fulan Marsu, sira husik ona, ita manan ona ita nia soberania, hanesan ita mak na’in asegura ita nia rai ne’e nia soberania liu-liu Fronteira Maritima”, dehan Somotxo.
Primeiru Ministru Mari Alkatiri antes ne’e deklara ona ba mídia nasionál katak sei reforsa kapasidade instituisaun F-FDTL no PNTL intermu rekursu no ekipamentu hodi nune’e bele fo vizilansia ba soberania tasi timor.
“Hau hateten ne’e tenki reforsa, ba timoroan hothotu labele ba luku tasi defende ita nia fronteira. Entaun tenki aumenta kapasidade ba ita nia forsa, ba ita nia polísia. Ita tenki mós iha aviaun para tenki semo iha ita nia fronteira maritima nia leten”, dehan Alkatiri, tersa, (06/03) foin lalais ne’e.
Nia mós argumenta katak depois rezultadu asina akordu fronteira maritima, Timor-Leste simu responsabilidade boot hodi asegura. Tanba ne’e presiza halo planu dezenvolvementu ba instituisaun F-FDTL no PNTL liu-liu rekursu umanu no fasilidade hodi nune’e bele asegura soberania tasi timor.
Iha parte seluk, Adjuntu Diretur Fundasaun Mahein João Almeida hateten katak Governu presiza fó apoiu fasilidade no ekipamentu ba instituisaun milítar no polísia atu bele halo kontrolasaun ho masimu ba riku-soin iha area tasi timor. (Editor, Lariwa).
