Dili-SMI, Governu Japaun liu husi ninia Embasada iha Timor-Leste kontinu hatudu komitmentu hodi apoiu tekniku ba Parlamentu Nasionál Timor-Leste – PN-TL kona-ba planu estratéjiku no reformasaun PN nian.
Tuir Embasador Japaun Hirosi Minami katak ninia prezensa iha ne’e hanesan reprezenta estadu Japaun mai Timor-Leste atu ajuda Governu no Parlamentu Nasionál.
“Hau nia misaun mai iha ne’e, hodi apoiu nasaun Timor-Leste, dezde nasaun Timor-Leste hetan nia indepedensia tamba ne’e ami kontinua atu suporta nasaun ida ne’e no Parlamentu Nasional”, dehan Hirosi Minami ba jornalista sira, iha Salaun Konfrensia PN, Segunda (12/03).
Embasador ne’e hatutan Governu Japaun sempre prontu hodi ajuda Governu Timor-Leste no Parlamentu Nasionál liu-liu fó asistensia teknika no area importante seluk ne’ebé karik presiza Governu Japaun nia apoiu.
Iha fatin ketak wainhira konfirma kona-ba reformasaun estrutura PN nian, Prezidente Parlamentu Nasionál Aniceto Guterres afirma katak la’os tempu atu halo reformasaun ba estrutura PN nian.
Maibe nia hatutan katak hasoru malu ho Embasador Japaun ne’e hodi fortifika parseria fortalesementu instituisaun PN nian. Liu-liu kona-ba programa dezenvolimentu planu estratéjiku PN nian ne’ebé to’o agora seidauk iha revizaun.
“Koalia kona-ba parseria fortalesementu institusional Parlamentu Nasionál nian, ne’ebé programa ida ne’e dezenvolve husi Planu Estratéjiku Parlamentu Nasionál nian ne’ebe adopta tiha ona lejizlratura anterior”, dehan Aniceto. (Editor, Mateus Barros).
