Koreia-SMI, Sekretáriu Estadu Juventude no Traballu – SEJT Nivio Magalhães husu ba traballador timoroan ne’ebé dadaun ne’e hetan oportunidade hodi serbisu iha Koreia do Sul atu hatudu komportamentu no disiplina iha serbisu fatin.
"Hau husu ba imi hotu atu servisu ho disiplina no responsabilidade atu nune’e la bele taka dalan ba Timor-oan sira seluk nebe mos hakarak mai servisu iha rai ne'e", dehan Nivio Magalhães wainhira hala’o sorumutu ho traballador timoroan iha Koreia do Sul foin lalais ne’e liu husi vizita ofisiál ba nasaun refere.
Durante sorumutu ho traballador timoroan, Sekretáriu Estadu ne’e fó hanoin atu halo serbisu ho kuidadu no diak hodi nune’e tempu serbisu remata bele fila mai timor hodi kontribui ba nasaun nia apoiu familia nia moris.
"Hau mai hasoru imi atu haree imi nia kondisaun no rona imi. Tanba ne'e hau husu imi traballador sira atu kuidadu imi nia saude no an durante servisu iha Koreia tanba familia no nasaun hein hela imi". Tenik Nivio.
Nia mós esplika ba traballador sira katak wainhira númeru ba traballador timoroan sei aumenta ka menus depende mós ba traballador hirak ne’ebé dadaun hetan ona oportunidade uluk hodi serbisu iha nasaun refere.
Iha vizita ofisiál ne’e, SEJT mós halo vizita ba fabrika Infeso iha Incheon, no Ns Factory iha Namyangju Gyeonggi-do, Repúblika Koreia, ne'ebé dadaun ne’e iha traballador timoroan balun ne’ebé mak mak servisu fatin refere.
Husi vizita ne’e, Nivio mós husu ba empregador ne’e atu aumenta númeru traballador husi Timor-Leste no fó asistensia ne’ebé dignu no umanu. Antes remata vizita, Nívio Magalhães fó sertifikadu apresiasaun ba fabrika na’in ne’ebé durante ne’e simu ona traballador timoroan hodi serbisu iha ninia fabrika.
Durante vizita SEJT mos hala'o vizita hodi haree diretamente sira nia kondisaun serbisu no fatin toba traballador timoroan sira. (Editor, Lariwa).
