Dili-SMI, Sosiadade Sivil hanesan Fundasaun Mahein – FM husu membru husi instituisaun Falintil – Forsa Defeza Timor Leste – F-FDTL no Polisia Nasional Timor Leste – PNTL atu utiliza didiak kilat tuir regra no prosedementu sira.
Tuir komunikadu imprensa ne’ebé FM fó sai katak institusaun F-FDTL no PNTL sei infrenta problema boot kona-ba jestaun no utilizasaun kilat tuir regra no prosedementu ne’ebé loloos.
“Kilat sira ne’ebé husi institusaun seguransa nian sai nafatin preokupasaun husi públiku tomak. Liu-liu kilat husi institusaun PNTL no FALINTIL-Força de Defesa Timor-Leste (F-FDTL) nia jestaun no utilizasaun”, Hakerek iha komunikadu ne’ebé SMI asesu iha sitíu ofisiál FM nian foin lalais ne’e.
Iha komunikadu ne’e mós FM kestiona kona-ba impaktu husi utilizasaun sala kilat iha instituisaun F-FDTL no PNTL halo ema sivil balun mate, kanek, ameasa no estraga animal protejidu sira durante tinan hirak ikus ne’e.
“Portantu efeitu husi kilat iha Timor-Leste iha tinan hirak ikus ne’e rezulta ona ema mate, kanek, ameasa, estragus no hasoru animal protejidu sira”, dehan iha komunikadu refere.
Mensiona mós kestaun importante kona-ba kilat balun husi instituisaun F-FDTL no PNTL ne’ebé to’o ohin loron seidauk identifika loloos. Hanesan kilat balu husi instituisaun PNTL ne’ebé lakon iha krize 2006 seidauk rekoilla hotu.
Liu husi komunikadu ne’e mós FM kestiona kona-ba membru F-FDTL no PNTL balun ne’ebé fó kilat ba ema sivil no labarik sira kaer hodi hasai foto tau iha mídia sosiál hanesan facebook.
Ho nune’e, FM rekomenda ba komandu F-FDTL no PNTL atu hadi’a mekanizmu interna instituisaun kona-ba jestaun no utilizasaun kilat. Husu mós ba komandu F-FDTL – PNTL presiza foti medida ida ne’ebé rigor ba membru sira ne’ebé utiliza kilat la tuir nesesidade no prosedementu uzu kilat nian. (Editor, Lariwa)
