Dili-SMI, Xefe Estadu Francisco Guterres Lú Olo fó atensaun ba Partidu Polítiku – ParPol sira ne’ebé sei kompete iha eleisaun antisipada atu hato’o programa wainhira iha periodu kampaña eleitorál, la’os hatun malu hodi provoka konflitu iha rai-laran.
Prezidente Repúblika fó nia argumentu katak tama ba periodu kampaña eleitorál ParPol sira prepara programa hodi nune’e povu bele hili tanba povu hakarak moris diak no hakmatek.
“Hau hanoin kampaña ida agora dadaun ne’e para atu hato’o deit programa polítika kada partidu ida-idak nian para povu hili, povu la’os atu ba hili fali hatun malu no hasa’e malu, povu presiza mak atu bele moris diak moris hakmatek”, dehan Lú Olo ba jornalista sira iha Centro Covensoens Dili – CCD, Sabdu, (17/03) foin lalais ne’e hafoin partisipa Kongresu Nasionál RENETIL ba dahitu nian.
Prezidente mós kontinua fó hanoin ba ParPol sira atu labele uza asuntu nasionál hanesan Fronteira Maritima sai matéria kampaña partidu nian hodi bele hetan votu husi povu. Maibe oinsa koalia programa partidu nian kona-ba asuntu edukasaun, saude, infra-estrutura no asuntu sira seluk ne’ebé liga ho povu nia moris.
“Partidu politikus sira atu ba koalia povu koalia ho honestu koalia lolos programa kona-ba edukasaun atu halo oinsa, saude atu halo oinsa, infra-estrutura atu halo oinsa, sistema atu monta oinsa para bele sai servidor diak ba povu”, dehan Komandante Supremu F-FDTL ne’e.
Nune’e mós nia kontinua fó hanoin ba ParPol sira atu labele privatiza no uza asuntu estadu ka nasionál hodi sai matéria kampaña partidu durante periodu kampaña eleitorál. Tanba tuir PR nia observasaun katak antes xefe negosiador fronteira maritima Kay Rala Xanana Gusmão fila mai timor pesoál balun hahu uza FM sai matéria ba kampaña polítika nian.
“Labele uza FM ka negosisaun ida ne’e sai fali matérial kampaña partidu nian maibe ida ne’e interese nasionál nian, ema ida ka partidu ida labele uza ida ne’e. Hau haree iha tempu ida ikus antes ita nia xefe negosiador prinsipál to’o mai balun komesa uza ona para hodi hanesn bukae politiku mais labele”, dehan eis gureileiru ne’e. (Editor, Mateus Barros).
