Evita Notísia Falsu, Jornalista Tenke Disiplina iha Verifikasaun

Membru Konsellu Imprensa Paulo Araújo katak jornalista iha responsabilidade importante hodi halo verifikasaun ba informasaun sira ne’ebé públika iha mídia sosiál antes atu kopía hodi sai notísia ida atu públika ba públiku.

“Kestaun copy paste ne’e hanesan jornalista ida tenke haree ba étika jornalístika, kuandu sai ba serbisu tenke verifika informasaun sira ne’e didiak mak foin hasai ba notísia”, dehan Konselleru Paulo iha Kaikoli, Tersa, (20/03) wainhira koalia iha workshop ho tema Hametin Reportazen Balansu Liu Husi Disiplina Verifikasaun.

Nia esplika katak KI iha papél importante hodi kontinua koalia ho mídia no jornalista kona-ba oinsa uza informasaun iha mídia sosiál ho diak hodi nune’e bele garante kualidade informasaun ba públiku

Iha fatin hanesan jornalista senior husi Australia Bob Howarth esplika katak jornalista timoroan presiza tebes kuidadu uza informasaun iha mídia sosiál ho disiplina verifikasaun molok atu fó sai ba públiku. Liu-liu oinsa jornalista sira identifika informasaun sira ne’ebé ID falsu sira públika iha facebook.

”Atu esplika kona ba oinsa bele identifika informasaun ne’ebe falsu ho loos, ezemplu iha nasaun seluk halo tiha ona relasaun ho ida ne’e, hau  sente katak Timor-Leste mós presiza buat sira ne’e hotu, presiza atu oinsa verifika faktus sira ne’e molok atu informa ba publiku”, dehan Bob.

Bob mós mensiona kona-ba kopia notisia ka fotográfia husi prodútu ema seluk nian presiza halo justifikasan hodi temi instituisaun pesoál ne’ebé sai na’in ba obra refere.

“Ezemplu ita foti notísia husi Timor Post ita labele públika direitamente deit dehan katak ida ne’e ami foti husi Timor Post mak foin públika sai ne’e para ita bele hatene fontes ne’e husi sé”, esplika Bob.

Bob esplika liu tan katak atu evita ka preven ema na’ok ka kopia fotográfia ka propriedade intelektual mak presiza tau simbolu Copy Right nian. (Editor, Mateus Barros)