Dili-SMI, Prezidente Tribunál Rekursu – PTR, Deolindo dos Santos katak tuir planu sei harii tribunál supremu iha Timor-Leste hodi kontribui diak liu tan sistema justisa iha rai-laran.
Maske nune’e PTR esplika katak wainhira atu implementa planu ne’e presiza apoiu orsamentu husi parte Governu.
“Atu harii prosesu konstrusaun foun ba tribunál supremu, tribunal rekursu, labele la’o mesak maibé depende apoiu programa orsamentu husi governu’, dehan Deolindo iha nia serbisu fatin Kaikoli, Tersa, (20/03).
Nia esplika liu tan katak la’os deit planu harii tribunál supremu maibe mós planu konstrui tribunál distrital sira ne’ebé konsidera urjente tanba atu responde ba nesesidade justisa iha rai-laran.
“Planu ne’ebe vistu ona iha tribunal rekursu, ba futuru tenki hari tribunal supremu, no la’os tribunal supremu deit maibé sei loke luan tan TDD ne’ebe urjente tebes hodi bele harii iha tempu badak nia laran”, dehan PTR.
Tuir PTR katak dadaun ne’e halo ona preparasaun dezeñu ba tribunál Distrital Dili nian no hein halo kontrusaun hodi fó espasu luan ba fatin tribunál nian. Maske nune’e, nia hatutan katak to’o ohin loron seidauk iha alokasaun orsamentu fiksu ba konstrusaun refere.
“Prosesu konstrusaun foun ba tribunál Distrital Dili nian, agora seidauk iha alokasaun orsamentu espesifiku, no bázeia ba dezeñu ne’ebé maka iha ne’ebe atu preve orsamentu hira hodi aloka ba ida ne’e seidauk hatene”, tenik nia. (Editor, Mateus Barros)
