Dili-SMI, Prezidente Repúblika Francisco Guterres Lú Olo apresia no orgullu ba serbisu instituisaun Polisia Nasional Timor Leste – PNTL ne’ebé durante ne’e halo esforsu maka’as hodi asegura paz no estabilidade iha rai-laran.
Xefe Estadu ne’e fó ninia votu konfiansa ba serbisu membru PNTL ne’ebé durante ne’e ho korazen boot hodi mantein seguransa ba povu no nasaun maske dala-ruma iha sitausaun defisil nia laran.
"Nu’udar Prezidente Repúblika, ha’ u hakarak hahi’i Ita-Bo’ot sira-nia esforsu no profisionalismu; ha‘u hahi’i mane no feto maluk sira ne’ebé, loroloron, tau sira-nia an iha risku laran, hodi garante seguransa no moris-hakmatek ba ita hotu-hotu”, dehan Prezidente Lú Olo wainhira halo diskursu iha Selebrasaun loron Aniversariu PNTL ba dala 18 iha Akademia Polisia Komoro, Tersa, (27/03).
Maske nune’e, Prezidente Repúblika mós husu ba membru instituisaun polisial atu hatudu profisionálizmu hodi kaer metin lei nu’udar prinsipiu báziku iha prosesu atuasaun nomós atividade lorloron nian.
Tanba, nia hatutan katak serbisu PNTL atu asegura paz no hakmatek iha povu nia leet la’os deit kaer metin orden públiku hodi defende no proteje povu no riku-soin maibe mós presiza respeitu diretu umanu nu’udar nasaun de diretu demokrátiku.
“Garante seguransa la’ós de’it kaer metin órden públika, proteje ita ema no ita-nia rikusoin no tau matan atu ita-nia ambiente hakmatek nafatin no ita la iha perigu. Garante seguransa signifika mós kaer metin Ita-nia Estadu no ita-nia sistema Direitu Demokrátiku”, dehan eis Prezidente Parlamentu Nasional, I lejizlatura ne’e.
Ho nune’e, nia komenta katak atu bele garante lei no orden ne’ebé diak, ajente polisia tenki hatudu hahalok no komportamentu diak hodi nune’e instituisaun PNTL bele hetan nafatin respeitu no apresiasaun husi povu.
Eis lider veteranu ne’e mós husu ba instituisaun PNTL atu halo serbisu hamutuk FALINTIL-Forsa Defeza Timor Leste – F-FDTL hodi garante prosesu eleisaun antisipada ne’ebé atu hili fila fali reprezentante foun iha Parlamentu Nasional. (Editor, Mateus Barros).
