Dili-SMI, Xefe Estadu Timor-Leste Francisco Guterres Lú Olo promúlga ona proposta Dekretu-Lei ne’ebé mak aprova Estatutu Orgániku Konsellu Kombatente Libertasaun Nasionál hodi nune’e bele fó kompetensia atu sai nu’udar orgaun sentrál ba organizasaun veteranu nia iha Timor-Leste.
“Diploma legál ne’e ninia intensaun atu define estrutúra, objetivu no kompeténsia sira Konsellu Kombatente ne’e nian. Konsellu ne’e hamrik nu’udar asosiasaun públika ida ne’ebé mak sai nu’udar orgaun sentrál ba organizasaun sira hotu veteranu nian iha Timor-Leste”, dehan Prezidente Lú Olo iha Palasiu Prezidensial Aitarak-Laran, Segunda, (26/03).
Lú Olo hatutan katak promúlgasaun ba dekretu lei konsellu veteranu ne’e importante tanba atu ajuda hadia problema veteranu nomós bele fó espasu ba veteranu hodi kontribui ba prosesu dezenvolvimentu nasionál.
“Prezidente Repúblika promulga diploma ne’e tanba hakarak tebes atu envolve veteranu sira iha prosesu dezenvolvimentu nasionál ne’e no mós hakarak atu kontribui ba prosesu hadia veteranu sira-nia moris liu hosi Konsellu ne’ebé refere”, dehan Prezidente Partidu FRETILIN ne’e.
Tuir eis Prezidente Parlamentu Nasional ne’e katak orgaun konsellu veteranu ne’e nu’udar orgaun konsulta Governu nian kona-ba asuntu hirak ne’ebé relasaun ho problema veteranu nia ne’ebé to’o ohin sei kontinua problematiku.
Nia mós informa katak dekretu lei ne’e nia rasik veta iha tinan 2017 tanba duvida ho konteúdu diploma refere liga ho aspeitu legalidade konstitusional nian. Maske nune’e la’os prezidente atu lakohi hamosu dekretu lei Konsellu Veteranu nian, maibe atu husu Governu no parlamentu haree didiak kualidade legal nia, atau labele hamosu problema iha implementasaun. (Mateus Barros)
