Dili-SMI, Governu liu husi Dirasaun Jestaun Merkadu Munisipiu Dili preokupa ho negosiante ilegál iha kapitál Dili ne’ebé durante kontinua faan sasan iha trotoar maske Governu prepara ona merkadu nasionál.
Diretóra Ezekutivu Jestaun Merkadu Munisipiu Dili - JMMD Berta Santa Viera esplika katak nia parte ekipa identifika area hirak ne’ebé durante negosiante sira sei kontinua faan sasan iha trotoar maka hanesan area Perumnas, parte Audian no parte area Comoro nian.
“Maske Governu prepara ona merkadu nasionál hanesan merkadu Manleuana no Taibesi maibe vendedores kontinua faan sasan iha trotoar leten, iha area Perumnas, Foho Osan Mean- Audian, no Elemloi”, dehan Berta jornalista SMI iha nia serbisu fatin Matadoru, Tersa, (03/04).
Diretóra ne’e haktuir katak dala-barak ona autoridade jestaun merkadu munispíu Dili fó avizu ba negosiante sira liu-liu faan modo iha area refere maibe negosiante hirak ne’e kontinua faan modo iha trotoar leten.
“Ami dehan tiha ona labele faan, ami dala ruma foti sira nia sasan ne’e maibé modo ne’e mai husi ne’ebe tau nafatin, ami foti hanesan ne’e para sira labele faan maibé sira kontinua fa’an”, dehan nian.
Relasiona ho kestaun refere, parte jestaun merkadu munisipíu Dili serbisu hamutuk ho autoridade seguransa hanesan Polisia Nasional Timor Leste – PNTL hodi kontinua buka meus hodi halo aprosiamsaun ba negosiante sira atu muda fatin faan modo tanba fó impaktu ba movimentu komunidade.
“Faan sasan iha trotoar leten ne’e ninia impaktu boot tebes, primeiru ba ema ne’ebé la’o tenki la’o fali iha Estrada, ne’e labele. Trotoar ne’e prepara ba ema atu la’o la’os atu tau modo”, dehan nia.
Durante nee ekipa jestaun merkadu munisipíu hamutuk ho PNTL kontinua halo patrolamentu rutina iha kapitál Dili hodi kontrola negosiante ilegál iha trotoar leten. (Editor, Mateus Barros).
