Dili-SMI, Ministru Defeza no Seguransa MDS, José Agustinho Sequeira "Somotxo" apelu ba Partidu Polítiku – ParPol sira atu hatoo programa iha kampaña eleitorál la’os halo kampaña soran povu hodi hamosu instabilidade iha rai-laran.
“Partidus politikus sira iha tempu kampaña koalia kona-ba programa la’os atu ba soran povu hodi oho malu”, dehan Somotxo hafoin loke abertura ba seminar nasionál kona-ba Prevensaun Violensia Eleitorál iha Salaun Ministériu Solidariedade Sosiál – MSS, Kaikoli, Tersa, (03/04).
Tuir Somotxo katak partidu polítiku sira iha responsabilidade morál hodi kontribui ba paz no estabilidade durante periodu kampaña eleitorál iha eleisaun antisipasda nian. Tanba, nia hatutan katak esperensia eleisaun dahuluk rezulta ema mate durante kampaña eleitorál.
“Iha eleisaun antisipada partidus politikus hotu-hotu ba koalia progarama la’os atu ba soran fali ema hodi oho malu. Iha tempu kampaña, hanesan tinan kotuk kona-ba kazu Afonso Kudalai ne’ebé mak mate iha tempu kampaña”, dehan atúal Ministru Defeza no Seguransa ne’e.
Iha biban hanesan prezidente Bankada FRETILIN Francisco Miranda Branco informa katak partidu FRETILIN iha komprimisiu hodi garante paz no estabilidade durante periodu kampaña eleitorál.
Tanba tuir nia katak demokrásia no pluralizmu partidu polítiku la signifika katak atu fahe malu no estraga malu maibe oinsa atu hamutuk hodi hadi’a povu nia moris.
“Prinsipiu FRETILIN nian atu implementa patria hotu-hotu atu nune’e bele simu malu, la’os demokrasia ho pluralizmu politiku ne’e atu fahe malu ne’e lae”, dehan nia.
Iha parte seluk Vise Xefe Departementu Prevensaun Konflitu Vice Chefe Departementu Nasionál Prevensaun Konflitus Komunitariu – DNPKK, Martinho De Carvalho Sarmento katak sorumutuu nasionál ne’ebé rede nasionál prevensaun komunitariu organiza atu oinsa diskute situasaun global relasiona ho eleisaun antisipada ne’e rasik.
Martinho haktuir katak semináriu ne’e partisipa mós husi partidu polítiku sira hodi diskute no tau hanoin hamutuk hodi halo prevensaun ba konflitu iha periodu kampaña eleitorál nomós depois rezultadu eleisaun antisipda.
Iha fatin ketak, Diretúr Ezekutivu Luta Hamutuk, José Alves da Costa husu ba partidu polítiku sira katak wainhira halo kampaña eleitorál iha báze presiza hato’o programa ho linguazen ne’ebé diak no amigavél hodi nune’e bele kontribui ba paz no estabilidade. (Editor, Mateus Barros).
