Dili-SMI, Conselho de Imprensa de Timor-Leste – CI-TL aprova ona orgaun komunikasaun hamutuk neen (6) hanesan Grupo Media Nacional – GMN, Diariu Independente, Diariu Timor Post, The Dili Weekly – TDW, Tempo Semanál no Media ONE Timor ne’ebé halo ona rejistu sira nia kompaña mídia.
“Orgaun Komunikasaun Sosiál sira ne’ebé mai rejistu maka Grupo Media Nasional (GMN), Diario Independente, The Dili Weekly, Timor Post no seluk rua tan ne’ebé mak registu ona”, dehan Prezidente CI, Virgilio da Silva Guterres hafoin lansamentu programa estajiu no ezame karteira profisionál iha Salaun Ministériu Obras Publikas no Telekomunikasaun – MOPTK, Kuarta, (04/04).
Virgilio hateten katak liu husi avaliasaun ba orgaun komunikasaun 6 ne’ebé rejistu iha CI, nune’e liu husi plenária CI aprova ona orgaun komunikasaun hirak ne’e. No, tuir nia katak rejistrasaun orgaun komunikasaun sosiál ne’e nu’udar kompetensia CI ne’ebé emenda husi lei komunikasaun sosiál.
Nia hatutan, CI kontinua nakloke ba orgaun komunikasaun seluk ne’ebé seidauk halo rejistu bele partisipa iha prosesu rejistrasaun refere.
“Ami nafatin nakloke ba orgaun komunikasaun sira seluk ne’ebé maka seidauk rejista, tamba tuir ami nia presepetiva katak tuir orgaun komunikasaun sosiál hamutuk sia falta sira na’in hira mak seidauk rejista. Hein katak iha tempu badak sira sei mai regista”, dehan diretúr Haburas ne’e.
Iha biban ne’e CI mós lansa ona programa estájiu no ezame karteira profisionál públiku atu nune’e jornalista sira bele tuir estájiu no ezame hodi nune’e bele hetan sertifikasaun husi CI liu husi atribuisaun karteira profisionál. (Editor, Lariwa)
