Dili-SMI, Relasiona Xefe negosiasaun Fronteira Maritima Kay Rala Xanana Gusmão ne’ebé halo aprezentasaun relatóriu negosiasaun ba públiku foin lalais iha Salaun Kategral Dili, membru Parlamentu Nasionál – PN konsidera nu’udar kampaña.
Membru PN no Xefe Bankada FRETILIN Francisco Miranda Branco hateten xefe negosiador FM tenki halo aprezentasaun relatóriu negosiasaun FM ba Governu la’os ba públiku. Wainhira halo aprezentasaun ba públiku ne’e konsidera nu’udar kampaña.
“Apresentasaun relatóriu ne’e sai hanesan matéria kampaña ne’e hatudu katak los duni negosiador principal uza materia ne’e atu sai fali materia kampanha tuir lolos ne’e apresenta ba governu.
Branco esplika katak ekipa negosiador nu’udar reprezentante estadu no Governu Timor-Leste iha prosesu negosiasaun mak xefe negosiador halo aprezentasaun relatóriu negosiasaun FM ba Governu la’os ba públiku hodi uza mídia transmisaun direta ba atividade ne’e.
“Ita hotu serbisu ba estadu I gestór estadu mak governu agora ita ba aprezenta fali ba públiku hodi aproveita mídiu transmisaun direita ba atividades ida ne’e. Ami hanoin los duni ida ne’e ita uza fali matéria ida ne’ebé tuir lolos ita hotu nian ba fali ita nia polítiku partidu nian”, dehan Branco ba SMI iha Parlamentu Nasional, Kuarta, (04/04).
Parte seluk, membru PN no Vise Bankada Partidu Demokratiku – PD Luis Mendes konkorda ho xefe negosiador FM ne’ebé halo aprezentasaun relatóriu negosiasaun ba públiku tanba bele ajuda fahe informasaun ba povu hodi kompriende kona-ba asuntu FM ne’e rasik.
“Hau hanoin povu ne’e matenek tiha ona ne’ebé sira hatene ona halo diferensia ida ne’ebé mak asuntu polítiku partidaria, ida ne’ebé mak asuntu polítika estadu. Entaun ba partidu PD hanesan reprezentante PD tuur iha uma fukun ida ne’e la senti ida ne’e hanesan kampaña partidaria ninian. Povu hotu hotu hatene asuntu ida ne’e la’os asuntu partidu, asuntu ida ne’e asuntu estadu”, dehan Luis.
Nia hatutan katak Xanana halo aprezentasaun ne’e la’os asuntu partidaria maibe kualidade nu’udar lider istoriku no nasionál ba povu no nasaun ida ne’e.
No,antes ne’e wainhira fila husi estranjeriu xefe ekipa negosiador FM Xanana Gusmão halo deklarasaun aberta ba públiku katak la halo aprezentasaun relatóriu rezultadu negosiasaun ba Governu tanba nia la’os membru Governu. (Editor, Lariwa).
