Dili-SMI, Prezidente Konsellu Imprensa – PKI, Virgilio da Silve Guterres hateten katak kobertura iha Eleisaun Antisipada – EA, jornalista presiza kaer metin Kódigu Étika Jornalístiku nomó matein independensia hodi nune’e bele fó sai informasaun ne’ebé kualidade no loloos.
“Husu ba maluk sira hanesan profesionál tenki hakruk nafatin ba kode etika, oinsa marka ita nia atetudi, marka ita nia pozisaun. portantu ita ne’e la’os netral maibé ita tenki independensia”, dehan Virgilio liu husi Konfrensia Imprensa iha Edifisiu KI, Kinta, (05/04) foin lalais ne’e.
Liu husi biban konfrensia imprensa ne’e, Prezidente KI ne’e fó hanoin ba mídia sira atu kontinua mantein no garante diretu antena ba partidu hothotu ne’ebé sei halo kampaña eleitorál hodi kompete iha eleisaun antisipada.
Eis Prezidente Asosiasaun Jornalista Timor Lorosa’e – AJTL ne’e mós husu ba orgaun komunikasaun sosiál hothotu atu fó orientasaun ne’ebé klaru ba jornalista sira hodi nune’e bele garante espasu diretu antena ba partidu hothotu ne’ebé justu no imparsiál.
Nia mós kontinua fó atensaun katak jornalista presiza evita hakerek notísia ho opiniaun privadu maibe hakerek notisia bázea ba fonte ruma.
“Ita mak tenki iha kapasidade atu halo oinsa notísia ne’e ema labele haree katak ita maka koalia maibé lider sira mak koalia. Partidus sira mak koalia entaun tamba ne’e sira kuando akuza malu ita tenki konfirma ba malu husu los tiha mak ita foin hatun notisia, se lae hatun sala ita mak sai alvu”, dehan Virgilio.
Eis jornalista no ativista pro-independensia ne’e mós fó hanoin ba editor no xefi redasaun kanál mídia sira tau verifika didiak notísia sira husi jornalista sira antes halo publikasaun hodi nune’e minimiza violasaun Kódigu Étika Jornalístiku nian.
“Bainhira atu halo notísia tenke halo chek and ricek ba notisia sira ne’ebé jornalista sira haruka husi báze mai, atu nune’e bele evita notísia ka kontéudu tendensia atu halo defamasaun ba parte seluk”, Tenik nia. (Editor, Mateus Barros).
