Dili-SMI, Sekretáriu Estadu Konsellu Ministru no Komunikasaun Sosiál – SEKMKS – Matías Boavida hateten katak jornalista presiza iha kapasidade ne’ebé naton hodi bele fó informasaun ne’ebé kredivel durante periodu kampaña eleitorál ba Eleisaun Antisipada – EA nian.
Tuir Matías Boavida katak jornalista presiza kuidadu no tau atensaun masimu ba asuntu verifikasaun ba informasaun ka fonte ruma antes públika notísia ruma hodi nune’e labele viola regra jornalístiku nian.
‘’Ita sem de koordenasaun sei iha cross cheking hotu sumber ne’ebé ita iha, hatun tiha informasaun embora ita seidauk halo, ida ne’e ita hakat liu regras ne’ebé mak ita iha. Lolos ita halo cross cheking”, dehan Matías Boavida iha Salaun Pusat Budaya, Kintal-Boot, Segunda, (09/04).
Boavida husu atu jornalista hases an husi informasaun sira ne’ebé promove no hamosu diskriminasaun rasiál, etnika no relijaun.
Iha parte seluk, Prezidente Timor Leste Press Union – TLPU, Francisco Belo Simões husu ba jornalista sira atu labele fó sai informasaun ne’ebé iha tendensia bele estraga paz no estabilidade durante kampaña eleitorál.
Maibe, nia hatutan oinsa jornalista bele promove paz no estabilidade liu husi prodútu jornalístiku ne’ebé tuir Kódigu Étika Jornalístiku nian.
“Husu ba maluk jornalista sira hado’ok án husi tentasaun deklarasaun ne’ebé mak hamosu indisita sadismu ho odiusmu. Vizaun ne’ebé mak iha promove jornalista sira iha etika, buat ne’ebé atu garante ita nia independensia atu garante ita nia dignidade buat ne’ebé ita presiza mak servisu tuir kode etika ne’ebé mak ita iha ona”, dehan Francisco Simões.
Iha fatin ketak, tuir Vise Diretúr Asosiasaun HAK Sisto dos Santos mós fó atensaun ba mídia no jornalista sira atu kontinua kuidadu no mantein imparsialidade wainhira transmite informasaun durante period eleisaun antisipada nian. .
“Ami preokupa tamba mídia nu’udar ajente ida ne’ebé importante oinsa atu transmiti informasaun loloos, informasaun loloos ho mós ne’e bainhira ita mantein ita nia imparsialidade, ita nia neutralidade ne’ebé maka la sadere ba partidu politiku ida”, dehan Sisto. (Editor, Mateus Barros).
