Dili-SMI, Prezidente Comissão Nacional de Eleições – CNE, Alcino de Araújo Barris apela ba partidu polítiku sira atu labele organiza labarik hodi tuir kampaña eleitorál tanba konsidera hanesan halo esplorasaun ba diretu labarik nian.
“Partidos politikus sira labele mobiliza labarik sira tau labarik sira iha kareta lori ba halo kampaña eleitorál no labele lori labarik sira halo pawai”, dehan Alcino Barris hafoin halo Abertura seremonia Ritual ba Paktu Unidade Nasional – PUN, iha Edifísiu CNE, Laline-Lari Gutu, Sexta, (06/04) semana kotuk.
Eis ministru Interior ne’e mós fó atensaun ba públiku atu labele lori labarik minoridade hodi involve iha kampaña tanba lei la premite.
“Ita ba uza fali labarik minoridade sira ne’e sira la kompriende buat ida kona-ba ida ne’e, agora karik sira iha fatin ne’ebé sira hela besik ba kampu ne’ebé uza ba ema halo komisiu ka kampaña eleitorál, ida ne’e ami CNE sempre dehan katak ida ne’e ita labele proibiu”, dehan nian.
Iha biban ne’e, Alcino Barris mós esplika sobre mekanizmu kalendariu elektroniku ne’ebé parte CNE prepara hodi labele soke malu kona-ba prosesu kampaña partidu polítiku ida ho partidu sira ne’ebé kompete iha eleisaun antisipada.
“CNE uza sistema elekroniku lori instaura kalendariu ba kampaña eleitorál ho maneira katak partidus politikus sira depois de prienxe formulariu ne’ebé husi CNE no CNE mak sei hatama iha sistema depois sistema mak detekta emidiatamente, karik iha konsidensia soke malu entre partidus politikus sira”, dehan Barris. (Editor, Mateus Barros)
