Dili-SMI, Diretór Nasionál ba Unidade Edukativa no Kultura, Alvaro Rosario Vasconselhos informa katak veteranu Australianu sira sempre vizita muzeu rezistensia Timor-Leste hodi haree besik istoria luta povu Timor-Leste ba ukun rasik-an.
Nia esplika katak durante ne’e vetaranu Australianu sira ne’ebé mai husi Australia sempre vizita muzemu hodi haree istória funu povu Timor-Leste ne’ebé arkiva hela iha muzeu de rezistensia durante ne’e.
“Sira nia vizita ne’e atu mai kuiñese klean liu istoria kona-ba resistensia Timor nia, hanesan, arkivu Nasional, no arkivu Xanana/Chega maibé ida ne’e hanesan historia Timor ne’e mak sira hola desizaun mai vizita iha ita nia rai”, dehan Alvaro iha Muzeu Rezistensia, Kaikoli, Segunda, (09/04).
Iha parte seluk Miguel Fatuk nu’udar Veteranu Australiano esplika katak sira sempre mai iha Timor-Leste no halo vizita dala-barak ona muzeu hodi haree no estuda istória luta povu Timor-Leste ba libertasaun nasionál.
Nia hatutan antes ne’e nia rasik liu husi misaun forsa manutesaun da paz nomós misaun umanidade ONU iha tinan 2001 hodi apoiu umanitaria ba povu Timor Leste. Nune’e mós nia sai asesor ba komandante Falur Rate Laek nian.
“Primero, ha’u mai uluk ho INTERFET sira iha tinan 1999, depois fila fali mai ho UNTAET iha 2001. Uluk ha’u asesora ba komandante Falur Rate Laek iha Lospalos hanesan Asesor Australia nu’udar F-FDTL, Ha’u lori Grupu ida ne’e ho programa naran Timor Weekly”, dehan nian.
Tuir nia katak programa Timor Weekly ne’ebé veteranu Australianu sira trasa ne’e hakarak mantein no promove istória entre Timor-Leste no Australia durante funu mundiál II nian.
“Ami halo programa ne’e tamba istoria entre Australia ho Timor-Leste historia ne’ebé uniku no furak teb-tebes komesa iha 2a Guerra mundial ne’ebe Timoroan barak mate, terus tamba deside hodi apoiu forsa Australia Comando sira ne’ebe mai”, tenik nia. (Editor, Mateus Barros)
