Dili-SMI, Conselho de Imprensa de Timor-Leste – CI-TL nu’udar orgaun regulador hala’o sosializasaun kona-ba Lei Komunikasaun Sosiál, regulamente internal, papél mídia no Kódigu Étika Jornalístiku nian ba instituisaun FALINTIL- Forsa Defeza Timor Leste – F-FDTL.
Prezidente CI Virgilio da Silva Guterres esplika katak objetivu husi sosializasaun ne’e la’os deit fó hatene kona-ba lei komunikasaun sosiál ka papél mídia nian maibe mós koalia sobre kódigu étika jornalístiku no diretu resposta nian.
“Objetivu seluk mós katak ita hanoin no fo hatene kona-ba kóde étika ho direitus das respostas atu F-FDTL mós ho ofisiál sira hatene katak sira iha direitu hanesan ema singular i mos hanesan kolektivu iha direitus ba respostas”, dehan Virgilio iha Kuartél Jerál F-FDTL Fatuhada,Tersa, (10/04).
Virgilio esplika liu tan katak sosializasaun lei komunikasaun sosiál ne’e la’os deit ho F-FDTL maibe sei kontinua ho instituisaun seguransa hanesan Polisia Nasional Timor Leste – PNTL nomós ba públiku sira.
Nia hatutan pontu prinsipál husi sosializasaun ba instituisaun milítar no polísia atu informa kona-ba papél jornalista no orgaun komunikasaun sosiál atu nune’e bele fó espasu ba kobetura ba atividade importante sira ne’ebé presiza públiku hatene.
Tanba tuir nia katak durante ne’e dala-balun jornalista hetan difikuldade barak iha terenu hodi asesu informasaun ka kobertura tanba razaun segredu militár.
“Iha parte seluk kooperasaun ne’e ita bele hatene tambasa mak fatin ne’e ita labele asesu, liberdade imprensa se mak iha kompetensia atu koalia kona-ba ida ne’e, labele ema hotu-hotu koalia dehan ida ne’e segredu. Militár ne’e mak dehan maijor jeneral, direitur inteligensia ou ema ne’ebé ke ho ministru Defesa, PM, PR, oragaun soberanu sira ne’e, sira iha kompetensia tuir lei katak ida ne’e segredu. Agora diretúr ida ou at liu tan relasaun públika sira labele hateten katak ne’e segredu estadu tamba sira iha ne’eba ne’e atu fo informasaun”, dehan Virgilio.
Iha fatin hanesan Komandante Jerál F-FDTL Maijor Jenerál Lere Anan Timur hateten serbisu jornalista importante tebes atu fó informasaun ba povu maibe la’os asesu informasaun hothotu kona-ba serbisu militár nian.
“Jornalista sira iha ne’ebé deit nia papél no dever obrigasaun atu fó informasaun ba ita nia povu, kompeténsia jornalista sira nian la’os atu halo buat hotu iha areas balun ba sira liu-liu kona-ba area militár kona-ba segredu militár”, dehan Lere.
Jenerál fitun rua ne’e hatutan sosializaun lei komunikasaun sosiál no kódigu étika jornalítika husi CI ne’e importante hodi bele ajuda membru militár bele kompriende diak kona-ba serbisu jornalista no papél mídia nian.
“Ita respeita media nia profisaun, tamba sira nia profisaun sala ita hatene katak iha vias legais, imi liga mídia oinsa komunika oinsa relasaun entre imi ho mídia. Ohin loron KI ho nia membru sira mai iha ne’e para koalia oituan kona-ba kode etika mídia sosiál ninian para ita komprende. La’os dehan militar deit para atu domina deit maka matérial militar maibé hanesan ofisiál nu’udar profisionál nu’udar ema ne’ebé kuadru permanente iha instituisaun ida tenki domina areas hotu-hotu”, dehan Lere. (Editor, Mateus Barros).
