Dili-SMI, Sekretáriu Estadu Joventude no Traballu – SEJT, Nivio Leite Magahlães afirma katak polítika Governu haruka traballador timoroan sira ba estranjeiru laiha segredu no liu husi mekanizmu klandestina.
Nivio esplika katak programa kona-ba traballador ne’e nu’udar timoroan nian ne’ebé Governu iha komprimisiu atu garante prosesu transparante no fó oportunidade ne’ebé hanesan ba timoroan hothotu hodi hetan serbisu iha rai-liur.
“Hau mai hasoru malu ho kandidatu sira hamutuk 7000 resin hodi esplika kona-ba prosesu hotu atu nune'e ida ne'ebé mak pasa bele ba. Selesaun ne'e sei halo ba públiku la haree ba familia, grupu, ka partidu, maibé ba Timoroan hotu ne'ebé iha kapasidade merese atu hetan oportunidade ba servisu iha rai liur”, dehan SEJT Nivio Leite Magalaes iha GMT, Kaikoli, Tersa, (10/04).
SEJT mós esplika katak Governu sei konvida pesoál husi rai-liur hodi akompaña prosesu selesaun hodi nune’e bele garante transparante ne’ebé bele halo timoroan hothotu sastifas ba rezultadu avalisaun ne’e rasik, no sei laiha toleransia ba familiarizmu.
“Ba materia sira ne'ebé atu teste ha'u la hatete ba públiku sira atu hatene, tamba ne'e mak sei asegura katak prossesu ne'e hotu transparente no ba interese povu nia. Ba trabalhador balun ne'ebé latuir teste ba sira ha'u hatete katak laiha toleransia ba KKN”, katak nia.
SEJT hatutan katak relasiona ho programa ne’e karik pesoál ruma ne’ebé halo violasaun mak sei hetan sansaun administrativu ka sasaun disiplinar.
Lider husi jerasaun foun ne’e mós afirma katak sei esforsu hodi loke teste ba kandidatu trabalaldor hamutuk ema na’in atus hat hitu nolu resin hat (474) ne’ebé identifika ilegal atu nune’e bele hetan solusaun ho justu.
“Ami koalia ona ho sira ida ne'e sei fo solusaun ba sira, klaru katak wainhira numeru ne'e aumenta bele iha impaktu ba programa ida ne'e no programa ne'e bele reduz nia pergunta nomos bele taka, maibé hanesan Governante ida ha'u la'os mai buka deit Problema ha'u mós tenke iha solusaun ne'ebé justu ho nune'e traballador ba servisu iha rai liur tenke hetan tratamentu diak ho dignu”, dehan Nivio. (Editor, Mateus Barros).
