Dili-SMI, Eis guireleiru no atúal Komandate Jerál F-FDTL Maijor Jenerál Lere Anan Timur preokupa ho linguazen lider Partidu Polítiku – ParPol hanesan FRETILIN no AMP ne’ebé hala’o primeiru kampaña eleitorál iha Ainaro no Manatuto nakonu ho diskriminasaun.
“Partidu politiku sira hahu sira nia kampaña iha Ainaro, iha Manatuto liu-liu ba partidu bo’ot rua ne’e, preokupante oituan iha sira nia linguagen iha buat sira ne’e hotu kuaze iha deskriminasaun ou lider sira ne’e hare’e ida-idak koalia ninian”, dehan Lere Anan Timor iha Palasiu Prezidensiál Aitarak-Laran, Kuarta, (11/04).
Hafoin hasoru malu ho Prezidente Repúblika Francisco Guterres “Lú Olo”, Lere Anan Timur esplika katak nu’udar lider ba istituisaun defeza senti preokupa ho situasaun kampaña ne’ebé lider partidu sira la’os hato’o programa maibe koalia sira nia interese atu ukun.
“Ami nu’udar elementu siguransa ami mós iha preokupasaun kona-ba situasaun atúal ne’ebé agora ita atravesa dadaun, Preokupasaun liu-liu mak kona-ba interese partidu sira nian ita halo polítiku ne’e para atu ba ukun”,
Eis komandante FALINTIL iha rejiaun Ponta Leste ne’e mós informa katak durante sorumutu ho PR koalia kona-ba prosesu kampaña eleitorál nomós kestaun seguransa internal hodi garante paz no estabilidade durante periodu kampaña eleitorál.
Nune’e mós, Lere hatutan katak sorumutu ne’e koalia kona-ba oinsa atu halo seguransa ho diak ba lider sira ne’ebé dadaun ne’e hala’o hela atividade kampaña eleitorál iha báze.
“Ohin ami koalia liu kona-ba prosesu kampaña ba eleisaun ninian, ami koalia liu kona-ba seguransa ninian atu halo oinsa para ita nia kampaña politika ida ne’ebé agora dadaun hahu ona ne’e bele halo iha seguransa ho diak no iha estabilidade nia laran. aliende ne’e mós kona-ba oinsa atu halo seguransa ba ita nia lider sira ne’e, ida ne’e mak ami koalia”, dehan nia.
Iha biban hanesa jenerál fitun rua ne’e husu ba veteranu sira atu bele hato’o programa iha kampaña atu bele ajuda rezolve problema veteran iha rai-laran. (Editor, Mateus Barros).
